​Дәрменсіз әкесін қорлады: Түркістан облысында сотталған азаматтың жазасы күшейтілді

Түркістан облысында қарт әкесіне қатыгездік көрсету бойынша атышулы іске қатысты үкім қайта қаралып, жазасы күшейтілді.

Қылмыстық істер жөніндегі сот алқасы бірінші сатыдағы соттың шешімін өзгертіп, жаза мерзімін бес жылдан алты жылға дейін ұзартты. Қаулы 2026 жылғы 31 наурызда заңды күшіне енді.

Естеріңізге сала кетейік, ер адам 2025 жылғы 7 қыркүйекте әлеуметтік желілерде қарт адамды соққыға жыққан сәті түсірілген бейнежазба тарағаннан кейін ұсталған болатын. Тергеу барысында сот-медициналық сараптама жүргізу үшін жәбірленушінің мәйітіне эксгумация жасалды.

Іс материалдарына сәйкес, сотталушы өзінің дәрменсіз күйдегі 70 жастағы әкесін жүйелі түрде ұрып-соғып, азаптаған. Апелляциялық сот сотталған азаматтың ұзақ уақыт бойы жәбірленушіге физикалық және психикалық зардап келтіргенін, ал әкесі қайтыс болғаннан кейін бұл туралы құқық қорғау органдарына хабарламай, оны жерлеу әрекеттерін жасағанын атап өтті. Дәл осы мән-жайлар жазаны қатаңдатуға негіз болды.

Бұған дейін, 2026 жылғы 16 қаңтарда бірінші сатыдағы сот Садақбаевқа бес жыл бас бостандығынан айыру жазасын тағайындаған еді. Прокуратура бұл шешіммен келіспей, апелляциялық өтініш берді, нәтижесінде ол ішінара қанағаттандырылды.

Бүгін, 15:07