Түркістан облысында фармацевтикалық кәсіпорын іске қосылды

Ордабасы ауданы, Бадам ауылдық округіне қарасты Қарабастау ауылында «Дарын-2030» фармацевтикалық өндірістік кәсіпорны ашылды, деп хабарлайды Egemen.kz.

Заманауи талаптарға сай жабдықталған нысан клиникалық-бактериологиялық зертханаларға арналған медициналық реагенттерді өндіруге бағытталған. Кәсіпорынның негізін қалаушы – 40 жылдан астам тәжірибесі бар провизор, фармацевтика саласының білікті маманы Гулия Бексұлтанқызы. Ол жаңа өндіріс орны арқылы ел медицинасына сапалы отандық өнім ұсынуды және жергілікті тұрғындар үшін жаңа жұмыс орындарын ашуды мақсат еткен.

Салтанатты рәсім барысында облыстық мәслихат төрағасы Нұралы Әбішов құттықтау сөз сөйлеп, жаңа кәсіпорынның ел экономикасына қосар үлесіне тоқталды. Ол өңірде осындай инновациялық бағыттағы жобалардың арта түсуі – мемлекеттің индустриялық-инновациялық саясатының нақты нәтижесі екенін атап өтті. Ал аудан әкімі Азат Оралбаев «Дарын-2030» серіктестігінің бастамасы – бұл тек жаңа жұмыс орындары ғана емес, сонымен қатар отандық медицина мен денсаулық сақтау саласын дамытуға қосылған сүбелі үлес екенін атап өтті.