Түркістан облысының әкімі 100 млн теңгенің бейнеролигіне қатысты пікірін айтты

Түркістан облысының әкімі Нұралхан Көшеров Қазақстан тарихы туралы 100 млн теңгеге түсірілетін видеороликке қатысты түсініктеме берді. Оның айтуынша, «Ұлы Дала елі» орталығында көрсетілетін 3D-форматтағы роликтің өндірісі осындай қаржыландыруды қажет етеді, деп жазады Egemen.kz.

Әкімнің айтуынша, көлемді тарихи бейнеролик еліміздің туристік әлеуетін арттыруға бағытталған және күрделі техникалық шешімдерді талап етеді.

«Бұл – 3D-эффекті бар ролик. Туристік әлеуетімізді көтеру үшін арнайы сценарий жазылады. Біз өзге елдермен салыстырдық: шетелде осындай роликті жасау құны 200-300 мың долларға дейін жетеді. АҚШ-тағы Universal паркінде Гарри Поттер, Трансформерлер бойынша жасалған шоу да өте қымбат. Бұл жай видеоролик емес екенін түсіну қажет. Жобаның мақсаты – туризмді дамыту. Өкінішке қарай, түсінбеушілік резонанс тудырды», деді Көшеров брифингіде.

Әкімнің айтуынша, видеороликті дайындауға мердігер табу да қиын болған.

«Конкурсты үш рет өткіздік. Тек бір компания – G7 Exclusive жауап берді. Мұнда коммерциялық тұрғыдан қарасақ, бір жылда сол қаражатты қайтарып, әрі қарай табыс табуға болатын еді», деп түйіндеді ол.

Бұған дейін облыс әкімі «Ұлы Дала елі орталығы» мен «G7 Exclusive» компаниясы арасында жасалған келісімшарттың заңдылығын тексеруді тапсырған. Құжатқа сәйкес, видеоролик Қазақстан тарихын ежелгі дәуірден бүгінге дейінгі өнер түрлері арқылы көрсетуі тиіс. Ол арнайы голографиялық шоу-залда көрсетіледі.

28 қарашада жасалған келісімшарт бойынша жобаның құны – 100 800 000 теңге (ҚҚС-пен), ал жұмыс 2025 жылдың соңына дейін аяқталуы тиіс.