100 млн теңгеге бейнеролик түсіру: Түркістан облысының әкімі тексеріс жүргізуді тапсырды

Бейнероликте Қазақстан тарихын оның бастауынан қазіргі кезеңге дейін түрлі көркемдік формалар арқылы көрсету көзделген. Түркістан облысының әкімі аталған бейнероликті түсіруге бөлінген 100 млн теңгелік келісімшартты тексеруді тапсырды, деп жазады Egemen.kz.

Фото: Depositphotos.com

Тарихи бейнеролик жасау туралы келісімшартты жасау жөніндегі ресми жауап жарияланды.

«Облыс әкімі Нұралхан Көшеров аталған шарттың жасалған жағдайларын жан-жақты тексеруді, соның ішінде қажетті рәсімдердің сақталуын және бюджет қаражатының мақсатты пайдаланылуын қамтамасыз етуді тапсырды», деп мәлімдеді облыс әкімдігі.

Kazinform агенттігінің хабарлауынша, резонансқа ГККП «Ұлы Дала Елі орталығы» мен «G7 Exclusive» ЖШС арасында ұзақтығы жеті минут болатын тарихи бейнероликті жасауға арналған келісімшарт туралы әлеуметтік желідегі жазба себеп болған.

Мәдениет басқармасы түсіндіргендей, бұл орталықтың ақпараттық жүйелерін модерациялау және контентпен толықтыру қызметтерін сатып алу туралы келісім болған. Бейнеролик Қазақстан тарихын ежелгі петроглифтер, «аң стилі», шығыс миниатюралары, ұлттық ою-өрнектер, кескіндеме, графика және өзге де өнер бағыттары арқылы көрсетуі тиіс.

Бейнематериалды арнайы голографиялық шоу-залда көрсету жоспарланған. Роликтің ұзақтығы 7 минутқа дейін.

Түркістан облысының мемлекеттік сатып алулар басқармасы жобаның үш рет ашық конкурсқа қойылғанын, алайда әр жолы конкурстың өтпей қалғанын атап өтті. Сол себепті «Мемлекеттік сатып алу туралы» заңның 16-бабы 3-тармағы негізінде бір көзден алу арқылы келісімшарт жасалған.

28 қарашада қол қойылған құжатқа сәйкес, келісімшарттың құны – 100 800 000 теңге (ҚҚС-пен). Орындау мерзімі – 2025 жылдың соңына дейін.