Тексеріс жүріп жатыр: Жамбыл облысының әкімі перзентханадағы дауға қатысты пікір білдірді

Жамбыл облысының әкімі Ербол Қарашөкеев Орталық коммуникациялар қызметінің брифинг алаңында аймақтағы ана мен бала өліміне қатысты сауалға жауап берді, деп жазады Egemen.kz.

Журналист өңір басшысынан соңғы аптада әлеуметтік желіде жарияланған перзентханадағы дауға қатысты істің мән-жайын сұрады. 

Әкімнің айтуынша, дәрігер пара сұрады деп арыз жазған ана да, пациент жала жапты деген маман да арыздарын қайтып алған. Соған қарамастан, денсаулық сақтау мекемесінде тексеріс шаралары жүріп жатыр. 

«Перзентханада қандай жүйелі проблемалар бар екенін анықтап, шара қабылдайтын боламыз. Қазіргі таңда тексерістің нәтижесін күтіп отырмыз», деп жауап берді Ербол Қарашөкеев.

Айта кетейік, 35 жастағы Гүлім Оразбаева алтыншы баласын Тараздағы перинаталдық орталыққа Тұрар Рысқұлов ауданынан келіп босанған.

Туыстарының айтуынша, іштегі баланың үлкендігіне байланысты оған кесар тілігі жасалған.

«УДЗ 4 килограмм 400 грамм көрсетті. Облыстық ауруханада баланың үлкен екенін білген соң, оны Таразға кесар тілігіне жіберді. Бірақ онда оны табиғи жолмен босануға мәжбүр етті», деді әйелдің сіңлісі Айгерім Оразбаева.

Отбасының айтуынша, Гүлім дәрігерге ақша аударғаннан кейін ғана оны босану бөлмесіне апарған. Бірақ бір сағаттан кейін жаңа туған нәресте шетінеп кетті. Ал, әйелдің жатыры жарылып, жансақтау бөліміне түсті. Кейін жатырын алып тастауға тура келген.

«Оған дереу ота жасалуы керек еді. Олар оны бейсенбіде әкелді. Кесар тілігін кейінге қалдырды, содан кейін демалыс күндеріне қалды. Артынша ол дәрігерлер кесар тілігі үшін 20 000 теңге талап етіп жатқанын жазды», деді күйеуі Ермұхан Әмреев.

Күйеуі қайғылы жайттан кейін дәрігерлер 20 000 теңгені қайтарып бергенін айтады.

«Заң бойынша, мұндай мекемелердегі барлық қызмет тегін. Ақы төлеудің қажеті болған жоқ. Қазір ішкі тергеу басталды, деректер жиналып, тәуелсіз сарапшылар тартылды. Нәтижелер кейінірек жарияланады», деп мәлімдеді Жамбыл облыстық денсаулық сақтау басқармасы басшысының орынбасары Ерік Мұсабаев.