Спорт вице министрі Жәнібек Әлімханұлына қатысты дауға пікір білдірді

Туризм және спорт вице-министрі Серік Жарасбаев боксшы Жәнібек Әлімханұлының талдауынан допингтің анықталуына қатысты пікір білдіріп, спортшының командасына министрлік тарапынан қолдау көрсетілетінін айтты, деп хабарлайды Egemen.kz.

Фото: Ашық дереккөз

Серік Жарасбаевтың мәлімдеуінше, қазіргі уақытта министрлік Жәнібек Әлімханұлының командасымен тұрақты байланыста жұмыс істеп жатыр. 

Сонымен қатар вице-министр допингке қарсы ұйымның сынамадағы мельдонийге қатысты мәліметі салдарынан жоспарланған жекпе-жек өтпейтінін растап, алайда боксшының өз түсіндірмесіне сенетіндерін жеткізді.

«Біз Жәнібек Әлімханұлының айтқандарына сенеміз. Оның  допинг қолданбағанына еш күмәніміз жоқ. Заттың ағзаға қалай түскенін анықтау үшін допингке қарсы ұйыммен бірлесіп жұмысты жалғастыру қажет», деді Жарасбаев Мәжіліс кулуарында.

Серік Жарасбаев жағдайға асығыс қорытынды жасамауға шақырып, тексеру толық аяқталған соң ғана нақты шешім шығатынын атап өтті. Оның сөзінше, қажет болған жағдайда халықаралық сарапшыларды тарту мүмкіндігі де бар.

«Министрлік бұл жағдайды назардан тыс қалдырмайды. Біз спортшыға жан-жақты көмек көрсетуге әзірміз. Қазіргі уақытта түрлі болжам айтылып жатыр, бірақ ресми ақпараттар шықпайынша нақты баға беру дұрыс емес. Әр спортшының өз құқығын қорғау тетіктері бар, біз олардың командасына қажет қолдауды көрсетуге дайынбыз», деді ол.

Айта кетейік, «The Ring magazine» басылымы Жәнібек Әлімханұлының допинг тестінен өтпей қалғанын хабарлаған еді.

Кейіннен Жәнібек Әлімханұлы допинг-тестілеуден өте алмағаны туралы ақпаратқа өз таңданысын білдіріп, қайта талдау сұратқаны белгілі болды.

Бұған дейін, WBO Жәнібек Әлімханұлының допинг дауына қатысты тексерісті бастағанын және отандасымыздың командасы дауға қатысты Жәнібек Әлімханұлы мен Эрисланди Лара арасындағы жекпе-жек өтпейтінін ресми түрде мәлімдегенін жазған едік.

Естеріңізге сала кетейік, 6 желтоқсан күні Жәнібек Әлімханұлы үш белбеу үшін кубалық Эрисланди Лараға қарсы жекпе-жек өткізуі тиіс болған еді.