Ресей қорғаныс министрі ядролық сынақтарға қатысты пікір білдірді

АСТАНА, 5 қараша – Sputnik. РФ президенті Владимир Путин мен Ресей Қауіпсіздік кеңесінің мүшелері арасындағы кездесуде АҚШ-тың ядролық қаруды сынауды қайта бастау ниеті талқыланды.

Ресей қорғаныс министрі Андрей Белоусов АҚШ-тың әрекеттері "Вашингтонның стратегиялық шабуыл қаруын белсенді түрде арттырып жатқанын анық көрсетеді" деп айтты.

"Біріншіден, Ақ үй көп жыл бойы күшінде болған қаруды қысқарту және шектеу туралы келісімдерден үнемі шығып отырды. 2002 жылы зымыранға қарсы қорғаныс жүйелерін қысқарту туралы шарттан, 2019 жылы Орта және шағын қашықтықтағы зымырандар туралы шарттан және 2020 жылы Ашық аспан туралы шарттан шықты", - деп еске алды ресейлік министр.

Оның айтуынша, АҚШ-тың ядролық сынақтарға салынған мораторийден бас тартуы Вашингтонның жаһандық стратегиялық тұрақтылық жүйесін бұзуға бағытталған қадамы болуы мүмкін.

Белоусовтың пікірінше, АҚШ стратегиялық шабуыл қаруын тез жаңғыртып жатыр және ядролық оқтұмсығы бар қанатты зымыран жасап жатыр.

Оның айтуынша, америкалықтар 30 B-52H стратегиялық бомбалаушы ұшағын ядролық қару тасымалдаушыларына қайта айналдыруға дайындалып жатыр. Тіпті АҚШ зымыранға қарсы тежеуді, Ресей мен Қытай зымырандарын ұшыру алдында жоюды көздейтін "Алтын күмбез" бағдарламасын іске асыра бастады.

Сонымен қатар АҚШ армиясы 2025 жылдың соңына дейін 5,5 мың шақырым қашықтыққа жететін гипердыбыстық зымырандармен жабдықталған жаңа "Дарк Игл" орта қашықтықтағы зымыран жүйесін қабылдауды жоспарлап отыр.

"Жүйені болашақта Еуропа мен Азия-Тынық мұхиты аймағында орналастырылады деп күтіліп отыр". Бұл зымыран жүйесі орналастырылады деп жоспарланған Германиядан Ресейдің орталығындағы нысаналарға ұшу уақыты шамамен алты-жеті минутты құрайды", - деді Белоуссов.

Ол толық ауқымды ядролық сынақтарға дайындықты дереу бастау орынды деп санайтынын мәлімдеді.

"Новая Земля архипелагындағы Орталық сынақ полигонының күштері мен құралдарының дайындығы бізге оның қысқа мерзімде орындалуын қамтамасыз етуге мүмкіндік береді", - деді Белоусов.

Владимир Путин Ресейдің Ядролық сынақтарға жаппай тыйым салу туралы шарт бойынша міндеттемелерін орындайтынын, бірақ шартқа қатысушы басқа мемлекеттер ядролық сынақтар жүргізген жағдайда тиісті жауапты шаралар қабылдауы керектігін еске салды.

"Ресей әрқашан Ядролық сынақтарға жаппай тыйым салу туралы шарт бойынша міндеттемелерін қатаң сақтап келді және сақтай береді де. Біз бұл міндеттемелерден ауытқуды жоспарламаймыз", - деді Путин.

Ресей басшысы 2023 жылы АҚШ немесе шартқа қатысушы басқа мемлекеттер мұндай сынақтар жүргізсе, Ресей де тиісті жауапты шараларын қабылдауға міндетті болатынын айтқанын еске салды.

"Ресей Федерациясының сыртқы істер министрлігіне, қорғаныс министрлігіне, арнайы қызметтерге және тиісті азаматтық ведомстволарға осы мәселе бойынша қосымша ақпарат жинауды, оны Қауіпсіздік кеңесінде талдауды және ядролық қару сынақтарына дайындық жұмыстарын бастау мүмкіндігі туралы келісілген ұсыныстар енгізу үшін барлық мүмкіндікті жасауды тапсырамын", - деді Владимир Путин.