Түркістандағы мектептер жасанды интелектті еңбек сабағында қолдана бастады

Түркістандағы «Келешек мектептерінің» оқушылары жасанды интеллектіні еңбекке баулу пәнінде қолдана бастады.

Олар 3D модельдеу арқылы киімге қажетті ою-өрнектер әзірлеп, заманауи технологияны тәжірибеде қолданады. Бұл әдіс оқушылардың цифрлық сауатын арттырып, түрлі салада қолдануға жол ашады, дейді ұстаздар.

3D модельдеу үйірмесі аптасына 3 рет болады. Қазір мұнда оқушылар жасанды интелектінің мүмкіндіктерімен танысып, принтермен жұмыс істеуді үйренуде. Арнайы бағдарламаның көмегімен қалаған үлгіні сызып, оны құрылғы арқылы қысқа уақытта басып шығарады. Ұлжалғас Әбусейіт бұл үйірмеге қыркүйек айынан бері қатысып жүргенін айтады.

Ұлжалғас Әбусейіт, оқушы:

- Компьютерде сызбаны сызып, оны заманауи құрылғыға жүктеп, заттарды шығарып алуға болады. Біз түймелерді және қалам салғыш, бізге қажетті дүниелерді шығарып аламыз. Алдағы уақытта неше түрлі заттрады жасап, жарыстарға қатысамын деген ойым бар.  

Алғашқыда 3D құрылғыны қарапайым пішіндер жасауға қолданатын оқушылар қазір оны көркем еңбек сабағында пайдалана бастады. Принтер арқылы киімге түрлі-түсті түймелер, сәндік бұйымдар мен ою үлгілерін басып шығаруда. Дайын өнімді мектептегі тігін шеберханасына жібереді.

Әйгерім Нұржанова, көркем еңбек пәнінің мұғалімі:

- Түйменің размерлері болады. Көбінесе стандарт 2х2,5 размерде тапсырыс береміз. Оюдың размеріне 12х14 размер береміз. Соны алып келіп, қалып ретінде де қолданамыз, әрі аксессуар ретінде костюмдердің жағасына қолданамыз. егер костюмнің жағасына аксессуар ретінде қолдансақ, оның размері 8 см, ал қалып ретінде қолдансақ 12 см болады.  

Қазір мектепте 7 мен 10 сыныптардан 30-ға жуық оқушы модельдеу үйірмесіне қатысады. Кабинет барлық қажетті құралдармен жабдықталған. Мұнда балалар өздерінің қиялына ерік беріп, арнайы жоба жасауына да болады. Алайда үйірмеге төменгі сынып оқушылары қатыса алмайды.

Саида Саиднабиева, үйірме жетекшісі:

- Бұл жерде температурамен жұмыс болады. 210 гардусқа қызады принтердің іші. Кішкентай баланың бәріне қарап тұра алмаймыз, ұстап алуы мүмкін. Сондықтан 7-ден жоғарғы сыныптан аламыз. Олар осында өздерінің идеясымен заттарды шығарады. Көбінесе өздеріне жеке брелок, телефонына қап, өздерінің аты-жөнін басып шығаруға қызығады.  

3D модельдеу жүйесі оқушыларға заттың құрылымы мен пішінін және өлшемдік пропорцияларын тереңірек зерттеуге мүмкіндік береді. Сабақ барысында олар ЖИ түрлі салада қолдануды үйреніп жатыр. Алдағы уақытта зерек оқушылар өздері дайындаған бұйымдар мен киім үлгілерінен арнайы көрме ұйымдастыруды жоспарлап отыр.

Жандос Жұмабек, Ерболат Әбіш