Түркияда екі шетелдік барлау қызметінің агенттері ұсталды

Түркияның Ұлттық барлау ұйымы (MİT) үйлестірілген арнайы операция барысында елдің ұлттық мүдделеріне нұқсан келтірген тармақталған халықаралық тыңшылық желісінің көзін жойды, - деп хабарлайды Tengrinews.kz тілшісі TRT-ға сілтеме жасап.

Түркияның Ұлттық барлау ұйымы (MİT) үйлестірілген арнайы операция барысында елдің ұлттық мүдделеріне нұқсан келтірген тармақталған халықаралық тыңшылық желісінің көзін жойды, - деп хабарлайды Tengrinews.kz тілшісі TRT-ға сілтеме жасап.

Түрік қауіпсіздік қызметтеріндегі дереккөздердің мәліметінше, агенттік топ бір мезгілде екі түрлі шетелдік барлау ведомствосының тапсырмаларын орындап келген.

"MİT, Анкара бас прокуратурасы және аймақтық полицияның терроризмге қарсы күрес бөлімі қызметкерлері жүргізген бірлескен тергеу аясында елдің төрт провинциясында бір мезгілде рейдтер жүргізілді. Құқық қорғау органдарына тыңшылық ұяшығының жетекшісі деп болжанған B.E-ні қосқанда, жеті күдікті қолға түсті", — делінген материалда.

Бұл құрылымның тағы екі мүшесі басқа қылмыстық істер аясында бұған дейін қамауда отырған. Ұсталған жеті адамның барлығына тыңшылық бойынша ресми айып тағылып, сот шешімімен қамауға алынды.

Тергеу агенттердің Түркия аумағында үкіметтік емес ұйымдардың, түрлі қауымдастықтардың, этникалық топтардың және мемлекеттік қызметкерлердің жұмысына қатысты құпия ақпаратты мақсатты түрде жинағанын анықтады. Кейін олар бұл мәліметтер бойынша шетелдегі жетекшілеріне егжей-тегжейлі есеп дайындап отырған.

"B.E. мен оның сыбайластарының әрекеті ұзақ уақыт бойы сырттай бақылау, кибермониторинг және техникалық тыңдау әдістерін қолданған түрік арнайы қызметтерінің толық бақылауында болды. Операция нәтижесінде күштік құрылымдар байланыс арналарын, нұсқаулық беру тәсілдері мен желіні қаржыландыру схемаларын құжаттап қана қоймай, шетелдік барлау органдарының Түркиядағы ішкі құрылымы мен стратегиялық мақсаттарының құпиясын толық ашты", — деп түсіндіріледі материалда.

MİT-тің бұл ауқымды операциясы аймақтық тұрақсыздық жағдайында Түркияда белсенділік танытқан шетелдік тыңшылық желілерінің бетін ашқан шулы оқиғалар сериясының жалғасы болды. Кейінгі жылдары түрік арнайы қызметтері заңсыз агенттік желілермен үздіксіз күрес жүргізіп жатқаны атап өтіледі. Бұған дейін елде палестиналық белсенділерді аңду үшін жергілікті жеке детективтерді пайдаланған Израильдің "Моссад" барлау қызметінің жасырын ұяшықтары жойылған болатын. 2026 жылдың басында Анкара мен Ыстамбұлда жүргізілген осындай рейдтер кезінде Иран арнайы қызметтерінің мүддесі үшін әскери нысандар мен Инджирлик әуебазасы туралы мәлімет жинаған алты адам ұсталды.