Түстен кейін ішкілікке салынады : Семей мектебіндегі жанжал сотқа жетті

Семейде бастауыш сынып мұғалімі ішімдікке салынды деп көпшілік алдында айыпталғаннан кейін сотта жеңіске жетті. Сот таралған мәліметтерді шындыққа жанаспайды деп танып, жауапкерді оны теріске шығаруға міндеттеді, деп хабарлайды Tengrinews.kz Абай облыстық сотына сілтеме жасап.

Семей қаласының азаматтық істер жөніндегі ауданаралық сотының мәліметінше, мектеп директорына жолданған дауыстық хабарлама, сондай-ақ оқу орны ұжымының қатысуымен өткен кездесуде айтылған мәлімдемелер сотқа жүгінуге себеп болған.

"Жауапкер К. есімді азаматшаны үнемі ішімдік ішеді, жұмысқа спирттік ішімдік иісімен келеді және "түстен кейін ішкілікке салынып кетеді" деп айыптаған. К. таратылған мәліметтерді шындыққа жанаспайды деп тануды, жауапкерді оны теріске шығаруға, кешірім сұрауға және моральдық зиян өтемақысын өндіруге міндеттеуді сұрады", - деп хабарлады сот.

Сот жауапкер өз сөзінің шындығын растайтын дәлелдер ұсынбады деген қорытындыға келді. Сонымен қатар соттық психологиялық-филологиялық сараптама таратылған мәліметтердің қадір-қасиетке нұқсан келтіретінін, үшінші тұлғаларға жеткізілгенін және шындыққа сәйкес келмейтінін растады.

Сот жауапкерге мектеп директоры мен директордың оқу-тәрбие ісі жөніндегі орынбасарының қатысуымен мұғалімнен кешірім сұрап, таратылған мәліметтерді теріске шығаруды міндеттеді.

Сондай-ақ сот моральдық зиянды өтеу және сот шығындарын өндіру туралы талаптарды ішінара қанағаттандырды.

Сот шешімі заңды күшіне енген жоқ.

Еске сала кетейік, бұған дейін Тараз соты арнайы мектеп-интернат педагогінің ар-намысын, қадір-қасиетін және іскерлік беделін қорғау туралы талап арызын қарады. Сотқа жүгінуге мұғалім "жемқор", өсек айтады, тәрбиешілерге жала жабады және қомақты ақша жинайды деген айыптаулар себеп болған.

Google News арқылы жаңалықтарымызды қадағалаңыз