“Жемқор және өсекші“ Таразда мектептегі жанжал сотқа дейін жетті

Тараз қалалық соты арнайы мектеп-интернат педагогінің Б. есімді азаматшаға қарсы ар-намысын, қадір-қасиетін және іскерлік беделін қорғау туралы талап арызы бойынша азаматтық істі қарады. Істің мән-жайын соттың баспасөз қызметі мәлімдеді, деп хабарлайды Tengri Education.

Тараз қалалық соты арнайы мектеп-интернат педагогінің Б. есімді азаматшаға қарсы ар-намысын, қадір-қасиетін және іскерлік беделін қорғау туралы талап арызы бойынша азаматтық істі қарады. Істің мән-жайын соттың баспасөз қызметі мәлімдеді, деп хабарлайды Tengri Education.

Дау 2024 жылдың қыркүйек айында басталған. Мектеп директорына педагогтің үстінен арыз түскен. Оны "өсек айтумен айналысатын, тәрбиешілерге жала жауып, ірі көлемде ақша жинайтын жемқор" деп атаған көрінеді.

Мектеп басшылығы жүргізген ішкі тергеу барысында аталған деректер расталмады. Сот сараптамасы бұл мәлімдемелердің жағымсыз сипатта екенін және педагогтің беделіне нұқсан келтіретінін анықтаған.

"Заңнамаға сәйкес, таралған мәліметтердің шындыққа жанасатынын дәлелдеу міндеті жауапкерге жүктеледі, алайда қорғаушы тарап сотқа ешқандай дәлелдеме ұсынған жоқ", - деп хабарлады соттың баспасөз қызметі.

Іс материалдарын зерделей келе, сот талап қоюшының сыбайлас жемқорлыққа және ақша жинауға қатысы бар деген ақпарат шындыққа жанаспайды деген қорытындыға келді.

Сот жауапкерден талап қоюшының пайдасына 100 мың теңге моральдық шығын өндірді. Шешім заңды күшіне енді.