Атырауда тұрғынның жаңа жылдағы жалған қоңырауы сотқа дейін жетті

1 қаңтар күні таңертең жедел 112 қызметінің  нөміріне Балықшыдағы «ЯRмарка Retail» супермаркетіне бомба қойылғаны туралы хабарлама түскен. 

Дүкенде жарылғыш зат барын айтқан соң, оқиға орнына полиция, құтқарушылар және басқа да жедел қызметтер жеткен. Бірақ тексеріс барысында ешқандай жарылғыш құрылғы табылмаған.

Белгілі болғандай, жалған хабарды жасаған азамат бұған дейін отбасылық жанжалдан кейін қалалық полицияның №1 бөліміне жеткізілген. Ол жерде өзін жайсыз сезініп, жедел жәрдем шақырылған. Кейін қайтадан уақытша бөлімге қайтарылған. 

Сотта полицейлердің бірі оның алдын ала ескерткенін айтты: егер дереу босатылмаса, теракт туралы хабар беретінін айтқан. Көп ұзамай ол шынымен 112-ге қоңырау шалып, жалған ақпарат таратқан.

Мемлекет жедел қызметтердің шығуына 12 565 теңге жұмсаған. 

Сотта ер адам кінәсін мойындап, өкінгенін жеткізді.

Нәтижесінде оған 2 жыл 6 ай бас бостандығын шектеу жазасы тағайындалды. Бұл мерзім ішінде ол жыл сайын 100 сағат мәжбүрлі жұмыс атқаруы тиіс, мемлекетке шығынды қайтарып, процессуалдық төлемдерді өтеуі және Жәбірленушілерге өтемақы қорына 64 875 теңге аударуы қажет.

Айта кетерлігі, үкім шыққанға дейін ол бес айға жуық қамауда отырған. Бұл уақыт жазасына қосылып есептеліп, сот залынан босатылды. 

Тағы бір қызық жайт: жалған қоңырау шалған телефон иесіне қайтарылды.

Анастасия ШЕРСТЯНКИНА

Кеше, 19:18