Уәде емес, іс керек! Есбол тұрғындары әкімді сынға алды

Есболдағы жиын әдеттегі ресми сөздерден тез арылып, ашық әңгімеге ұласты. Тұрғындар жоспар мен мерзімнің қайта-қайта кейінге шегерілуінен шаршағанын айтып, нақты әрекет күтетінін жеткізді. Олар жедел жәрдем қызметін жақсарту, апатты жағдайдағы мектеп мәселесін шешу және Бағырлай каналындағы ұзаққа созылған жұмыстарды аяқтау жөнінде талап қойды.

2025 жылдың аяқталуына бір ай қалғанда Индер ауданының әкімі Серік Нсанбаев ауыл аралап, Есбол ауылындағы тұрғындармен кездесуге келді. Оның атқарылып жатқан жұмыстар жайлы егжей‑тегжейлі есебінен кейін ауыл тұрғындары бірден ең өзекті мәселеге көшті.

Ауыл тұрғындары жалғыз жедел жәрдем бригадасы басқа ауылға ауыстырылып кетеді деп алаңдап отыр. Ондай жағдайда Есбол, Өрлік және Көктоғай бір ғана жедел жәрдем бригадасының қарауына қалады. Алайда бұл үш ауылдың барлығы Атырау – Орал республикалық тасжолы бойында орналасқандықтан, жол-көлік апатынан зардап шеккендерді қабылдап келеді.

Зейнеткер Теңел Айтжанов Есболда шамамен 4 500 адам тұратынын, бұрын ауылда өз ауруханасы болғанын еске салды. Оның айтуынша, билік тағы да «оңтайландыру» жолына түсіп отыр.

«Бұл мәселенің аудан көлемінде шешілуін қалаймыз. Өйткені бұл ауыл ауданнан кейінгі халық көп шоғырланған жер. Бір ғана жедел жәрдем барлық жерге бірдей үлгере алмайды. "Жедел жәрдем" бригадасы барлық ауылға бір мезетте баруға үлгермейді, сол себептен оңтайландыруға қарсымыз. Есболға жеке бригада қызмет етуі керек, біз халық болып талап етеміз», – деді ол.

Мұны басқалар да қолдап, қол шапалақтап отырды. Аудан әкімі бұл жайы әлі де ойластыратынын айтқанымен нақты қандай шешімге келетіні белгісіз болып қалды.

Ауылдағы мектеп жайы күрделі күйде. 90 жылдық (1936 жылы салынған) тарихы бар Қ. Есқалиев атындағы мектептің апатты деп танылғанына біраз болды. Санэпидстанса мектепке оқуға рұқсат бермегенімен барар жері, басар тауы қалмаған оқушылар ескі метепке оқуға мәжбүр болған.

2021 жылы 320 орындық мектеп "сақалды" құрылысқа айналған. 1 млрд 445 млн теңге тұратын мектеп құрылысын "Оңдасын Строй" ЖШС аяқтамай тастап кетті. 

2023 жылы облыс әкімі Серік Шәпкенов есболдықтармен кездесуде сол жылы мектеп пайдаланылуға беріледі деп уәде берген болатын. Одан бері бақандай екі жыл өтсе де мектеп құрылысы бітпей тұр. 

Жаңа мердігер "Сала" ЖШС мектеп құрылысын осы жылдың аяғында пайдаланылуға беріледі дегенмен кейін 2026 жылдың көктеміне ығысқан.

Учаске бастығы Нұржан Харифуллин  40-қа жуық жұмысшы еңбек етіп жатқанын, құрылыс материалдары жеткілікті екенін, ғимараттың іші мен сыртқы абаттандыру жұмысы жүріп жатқанын жеткізді.

Тұрғындар бұл сөздерді сақтықпен қабылдады. Олар ашық түрде сенімсіздіктерін білдіріп, бұрын орындалмаған уәделерді еске салды.

Жиында Бағырлай каналын жөндеу жайы да көтерілді. Жоба бойынша сегіз көпір мен бірнеше су қоймасы салынуы тиіс еді, бірақ жұмыс тоқтап қалған. Бұл нысан ауыл шаруашылығымен айналысатын қожалықтар үшін аса маңызды.

«Неге екені белгісіз жұмыс тоқтап қалған, ал ауыл шаруашылығында еңбек етіп жатқан қожалықтар үшін бұл өте қажет еді»,- деді тұрғын.

«Канал жұмысына "Табиғат" мекемесі жауапты. Жобада қателік кеткен, түзету жұмыстары жүрді. Енді жұмысын қайта жалғастыратын болады», - деді аудан әкімі.

Зейнеткер Бағытжан Иманғалиев тағы бір күрделі мәселені көтерді. 2024 жылғы су тасқыны кезінде ауыл тұрғындары бөгетті өз қолымен күшейткен. Ал қазір оның топырағы мектеп құрылысына тасылып жатқанын айтты.

«Біз жоспарланып жатыр, ақшасы бөлініп жатыр, облыста қаралып жатыр деген уәдеден шаршадық. Сіз болатын, болмайтынын ашып айтыңыз. Бөгет соғуға ауылдың үлкен, кішісі күн, түн демей қатысты. Енді оның топырағын мектеп құрылысына тасып алуда. Оларға кім рұқсат берді. Көшешілік жолдардың кейбір жері түсіп кеткен, поштаның қоршауы құлап жатыр. Мұны иесіздік демей не дейміз»,-деді ашынған зейнеткер Бағытжан Иманғалиев.

Бұл сөздер залды айтарлықтай толқытты.

Бұдан бөлек тұрғындар көше жарығы, жол, т.б. мәселелерді айтып өтті. Жиында айтылғандар хаттамаға енгізіліп, алдағы жылдары орындалысы барысы жөнінде аудан әкімі тағы тұрғындарға есеп беретін болды.

Тұрғындар жолдың жағдайы, көше жарығы және мобильді байланыс сапасы туралы да айтты. Кейбір көшелер жарықсыз, ал байланыс кейбір ықшамаудандарда жиі үзіліп қалады.

Аудан әкімі барлық ұсыныстар хаттамаға енгізілетінін және жұмыс жалғасатынын мәлімдеді. Алдағы жылдары осы шешімдердің орындалуы жөнінде аудан әкімі тағы тұрғындарға есеп беретін болды.

Ләззат ҚАРАЖАНОВА

Бүгін, 12:17