Үй сатушыларға салық мөлшері артады

Біздің елде алыпсатарлармен күресті күшейтті.

Бұған дейін үйді бір жыл ішінде қайта сатқан адам түскен пайдадан 10 пайыз салық төлейтін. Бұл белгілі.

Енді келер жылдан бастап әлгі бір жылдық мерзім екі жылға дейін ұзарады.

Жаңа Салық кодексінде тағы қандай өзгеріс бар?

Еркебұлан Смадияров, тілші:

- Бір емес, бірнеше баспананы сатып алып, бір жылдан соң қымбатқа қайта сатуды кәсіпке айналдырып алғандар көбейді. 

Олар дәл осылай салықтан жалтарып, тұрақты табыс тауып отыр. Алайда жаңа заң алыпсатардың адымын тежеуі тиіс. Енді екі жыл ішінде пәтерді қайта сатқандар  салық төлейді. Мемлекеттік кірістер комитетінің мамандары мұндай төлем үйдің құнынан емес, түскен пайда есебінен алынатынын айтады.  

Ұлдана Сүлеймен, ҚР ҚМ Мемлекеттік кірістер комитетінің сарапшысы:

- Бұл табыс сату бағасы мен сатып алу бағасының айырмасы ретінде айқындалады. Мысалы, егер мүлік 15 млн теңгеге сатып алынып, 17 млн теңгеге сатылған жағдайда тек 2 млн теңгеге табыс салығы төленеді. Ол екі жыл ішінде. Ал екі жылдан кейін сатылған мүлікке табыс салығы төленбейді. 

Бұған дейін кез келген сатылымнан 10 пайыз ғана төлем ұсталатын  Енді бұл жүйе жойылады. Яғни табыс көбейген сайын салық та артады. Ол үшін арнайы шекті мөлшер бекітілген.

Ұлдана Сүлеймен, ҚР ҚМ Мемлекеттік кірістер комитетінің сарапшысы:

- Жеке табыс салығына қатысты прогрессивті шкала енгізілді. Табыс көлемі артқан сайын салық мөлшерлемесі де жоғарылайды. 8500 АЕК дейін, яғни 36 млн теңгеге дейінгі табысқа 10% мөлшерлеме қолданылады. Ал осы сомадан асқан табыс бөлігіне 15% мөлшерлеме қолданылады. 

Сапаралы Құрал, қаржыгер:

- Осы уақытқа дейін алып сатумен айналысып, ақша тауып жүрген адамдар үшін тиімсіз. Себебі олар, мысалы, мен бүгін алдым ғой үйді, ертең сататын болсам, үстіндегі пайызын міндетті түрде төлеуім керек. 

Жылжымайтын мүлік саудасына қойылған мұндай талаптар тұрғын үйге ғана емес, саяжай, автотұрақ, қойма мен гаражға да қатысты болады. Жаңа Салық кодексі келер жылдың қаңтарынан бастап күшіне енеді. 

Еркебұлан Смадияров, Қанат Махмұтов