Үкімет 2026 2030 жылдарға арналған боксты дамыту тұжырымдамасын бекітті

Құжатқа сәйкес, елімізде боксты дамыту сапалы жаңа деңгейге көтеріледі. Тұжырымдаманың басты мақсаты – бокспен айналысатын азаматтар санын арттыру, спортшыларды даярлау жүйесінің тиімділігін күшейту және қазақстандық боксшылардың халықаралық аренадағы бәсекеге қабілеттілігін нығайту.

Тұжырымдама 6 бөлімнен тұрады және саланы дамытудың негізгі бағыттарын толық қамтиды. Негізгі басымдықтар қатарында бокс инфрақұрылымын дамыту, бұқаралық спортты кеңейту және спорт резервін қалыптастыру, ғылыми-әдістемелік және медициналық сүйемелдеуді жетілдіру, жаттықтырушылар мен төрешілердің біліктілігін арттыру, сондай-ақ халықаралық ынтымақтастық пен кәсіби боксты дамыту көзделген.

Қойылған міндеттерді жүзеге асыру үшін 31 іс-шарадан тұратын кешенді жоспар бекітілген. Бұл жоспар саладағы өзекті мәселелерді жүйелі түрде шешуге және нақты нәтижелерге қол жеткізуге бағытталған.

Қазіргі таңда Қазақстанда бокспен 153 мыңнан астам адам айналысады. Олармен еліміздің барлық 20 өңірінде 2 мыңнан астам жаттықтырушы жұмыс істейді. Ұлттық құрама құрамында 595 спортшы бар – олардың қатарында негізгі, жастар, жасөспірімдер және балалар командалары қамтылған.

Сонымен қатар, өткен жылдың қорытындысы бойынша 39 мыңнан астам бала балалар-жасөспірімдер спорт мектептерінде бокспен шұғылданады. Оларды 1 385 бапкер даярлап келеді.

2026-2030 жылдарға арналған тұжырымдама аясында бокспен айналысушылар санын ұлғайту, дайындық жүйесінің сапасын арттыру және қазақстандық спортшылардың әлемдік деңгейдегі позициясын күшейту жоспарланып отыр.

Құжатты іске асыру отандық бокстың жүйелі дамуына жаңа серпін беріп, жастар арасында салауатты өмір салтын насихаттауға және халықаралық аренада Қазақстанның имиджін нығайтуға ықпал етпек.

Айта кетейік, Үкіметте цифрландыру, бәсекелестік және ЕАЭО нарығына қол жеткізу мәселесі талқыланды.