Украина әскерилері 9 тұтқынды атып өлтірген Ресей сарбазын қолға түсірді

Украина қауіпсіздік қызметі (УҚҚ) Ресей Қарулы Күштерінің 155-ші теңіз жаяу әскерлері бригадасының жауынгері Сергей Скобелевтің жауап алу видеосын жариялады. Ол бейнежазбада жасаған әскери қылмысын мойындаған, деп хабарлайды Arasha.kz.

2024 жылдың қазан айында ол Курск облысындағы Украина позицияларына шабуыл жасаған штурмдық топты басқарған. Ұрыс кезінде бір топ украиналықты тұтқынға алған Скобелев «Маниту» лақап аты бар командирінен тоғыз адамның көзін жою туралы бұйрық алады. Қарусыз сарбаздарды шешіндіріп, жерге жатқызған. Скобелев пен «Иваныч» лақап аты бар тағы бір ресейлік әскери қызметші тұтқындарға «бәрі жақсы болады», «сендерді айырбасқа жібереміз» деп алдап, артынша оларды салқынқандылықпен атып тастаған.

Арада бір апта өткенде Скобелевтің өзі Украина қорғаныс күштерінің қолына тұтқынға түсті. Бастапқыда ол бәрін жоққа шығарғанымен, УҚҚ-ның қолында оның кінәсін айғақтайтын бұлтартпас дәлелдер болған. Қазіргі соғыс заманында қылмысты жасырып қалу мүмкін емес — басқыншылардың зұлымдықтары не дрон объективіне ілігеді, не ерте ме, кеш пе қылмыскерді өз қаруластары ұстап береді, не болмаса «кейіпкердің» өзі мас күйінде істеген ісін айтып қояды.

Еске сала кетейік, соғыс тұтқындарын өлтіру — бұл халықаралық гуманитарлық құқық нормаларын бұзу ғана емес, бұл ескіру мерзімі жоқ әскери қылмыс. Қазіргі уақытта әскери қылмыскердің кім екенін анықтау — тек техника мен уақыттың еншісіндегі шаруа. Сол сияқты, оның лайықты жазасын алуы да (бұл жағдайдағыдай тек сот тәртібімен ғана емес) — уақыт мәселесі.