Украина Ресейдің 27 баллистикалық зымыранының біреуін ғана атып түсірді Зеленский

1 тамызға қараған түні Ресей Украинаға 35 зымыран және 185 соққы дронын ұшырды. Украина президенті Владимир Зеленскийдің айтуынша, олардың 27-сі баллистикалық зымыран болған.

Әуе қорғанысы баллистикалық зымырандардың біреуін ғана атып түсірген. Зеленский бұған Patriot жүйесіне арналған зымырандардың жетіспеуі себеп болғанын мәлімдеді.

Шабуылдың негізгі нысанасы Киев пен Киев облысы болды. Сонымен қатар Днепропетровск, Сумы, Харьков және Полтава облыстарына да соққы жасалған.

Киевтің жеті ауданында өрт шығып, 18 тұрғын үй, мектеп, Литва елшілігінің ғимараты және инфрақұрылым нысандары зақымданды. Алдын ала мәлімет бойынша, тоғыз адам қаза тауып, 30 адам жараланған. Зардап шеккендердің арасында төрт бала бар.

Киев мэрі Виталий Кличконың мәліметінше, «Киевмедспецтранс» аумағына екі рет соққы түскен. Бес жедел жәрдем көлігі толығымен өртеніп, тағы 20 автокөлік қатты зақымданды.

Зеленский халықаралық серіктестерді Украинаға әуе және зымыранға қарсы қорғаныс құралдарын жедел жеткізуге шақырды. Оның сөзінше, мұндай жүйелердің тапшылығы адам шығынының көбеюіне әкеліп отыр.