Украина Ресейдің әскери және мұнай нысандарына соққы жасалғанын мәлімдеді

Украинаның қауіпсіздік қызметі Қорғаныс күштерімен бірлесіп Ресейдің Мәскеу облысындағы әскери-өнеркәсіп кешеніне қатысты кәсіпорынға және бірнеше мұнай нысанына соққы жасалғанын хабарлады. Сонымен қатар Қырымдағы «Бельбек» әскери әуеайлағы да нысанаға алынған.

Украина қауіпсіздік қызметінің мәліметінше, Мәскеу облысында «Ангстрем» зауыты зақымданған. Бұл кәсіпорын Ресейдің әскери-өнеркәсіп кешеніне жартылай өткізгіш өнімдерін жеткізеді және АҚШ санкцияларының тізімінде тұр.

Бұдан бөлек, Мәскеу мұнай өңдеу зауыты, «Солнечногорская» мұнай айдау станциясы және «Володарское» мұнай айдау станциясы да соққыға ұшырағаны айтылды.

Сонымен қатар,  Қырымда «Бельбек» әскери әуеайлағының инфрақұрылымы мен әуе қорғанысы құралдары зақымданған.

Атап айтқанда, «Панцирь-С2» зениттік кешені, С-400 кешеніне арналған радары бар ангар, «Орион» дрондарын басқару жүйесі және «Форпост» ұшқышсыз ұшу аппаратының жерүсті басқару станциясы нысанаға алынған. Сондай-ақ зақымданған нысандар қатарында «жер-ауа» дерек беру пункті, диспетчерлік мұнара және «Бельбек» әуеайлағындағы ангар бар екені хабарланды.