“Үлкен ақша тапты“. Қазақстандағы алғашқы кибер алаяқтықты кім және қалай жасағанын ІІМ айтып берді

Қостанай облысында букмекерлік кеңсе қызметкері ойын нәтиже белгілі болғаннан кейін бәс тігудің амалын тапқан. Ішкі істер министрінің орынбасары Санжар Әділов мұрағаттағы іс туралы айтып берді, деп хабарлайды Tengrinews.kz тілшісі.

Министр орынбасарының айтуынша, Қазақстандағы алғашқы киберқылмыс 2003 жылы тіркелген. Букмекерлік компания қызметкері бәс тігуді өткен уақытпен рәсімдеу үшін сағатты кері жылжытқан. Жоспарын іске асыру үшін ол басқа елдің азаматын сыбайлас ретінде тартқан.

"Қазақстанда тіркелген алғашқы интернет-қылмыс, киберқылмыс Қостанай облысында жасалды. Букмекерлік компания қызметкерлерінің біреуі сағатты кері жылжытып, өзге елдің азаматы болған сыбайласының көмегімен бәсті өткен уақытпен тіккен. Ойын нәтижесін біле тұра, олар ірі көлемде ақша тауып, букмекерлік кеңсе қаражатын иемденген", - деді Санжар Әділов.

Қылмыс ашылды. Сол жылы Қазақстанда киберқылмыспен күресу үшін арнайы бөлімшелер құрыла бастады.

"2003 жылы ІІМ басшылығы мен ел Үкіметі киберқылмысқа қарсы іс-қимыл бойынша алғашқы бөлімше мен криминалдық полиция бөлімшесін құрды", - деп хабарлады министрдің орынбасары.

Бұған дейін бәс тігуге және жаңа көлік алуға 100 миллион теңгеден аса қаражат жұмсаған есепші-лудоман туралы жазған едік. Ер адам Батыс Қазақстандағы мемлекеттік кәсіпорындардың бірінде жұмыс істеген. Істің мән-жайын прокуратура өкілдері айтып берді.

Бізді Google-дың негізгі дереккөздер тізіміне қосыңыз