Ұлттық банк ескертеді: алаяқтардан сақ болыңыз!

Qazaq24.com, 24.KZ дереккөзінен алынған ақпаратқа сүйене отырып жаңалық таратады..

Елде алаяқтық тыйылмай тұр. Әсіресе Ұлттық банктің атын жамылып, азаматтарды тұза-ғына түсіргісі келетіндер бар. Осы ретте Ұлттық банк мамандары әккілерді анықтаудың жолдарын айтып берді.

Қаскөйлер Ұлттық банктің атын жамылып, халықты арбауға көшті. Ол үшін ресми бланкілердің және қызметтік куәліктердің жалған түрлерін пайдаланады. Сондай-ақ мемлекеттік органдардың эмблемалары мен суреттерін жиі қолданады. Жеке тұлғаның сеніміне барынша кіру үшін өзін банк қызметкері ретінде таныстырып, алдауға тырысады.

Гүлфар Артықбаева, ҚР Ұлттық банкі қауіпсіздік департаментінің жетекші маманы:

- Теріс пиғылды адамдар жалған құжаттарды, эмоцияларды пайдаланып, алдау және психологиялық қысым көрсету арқылы азаматтардың сеніміне кіріп, асығыс жағдай тудырады. Сонымен қатар алаяқтықтың алдын алуға немесе «ескі кредиттерді есептен шығаруға көмектесуді сылтаурата отырып, алданып қалған азаматтарға микрокредиттер немесе қарыздар рәсімдейді. Бұл мақсатта теріс пиғылды адамдар мемлекеттік порталдардан не екінші деңгейдегі банктерден келіп түскен СМС-кодтарды сұратады.

«Егер осы іспетті жағдай орын алса, сақ болған жөн», - дейді мамандар. Өйткені Ұлттық банк жеке тұлғаларға қызмет көрсетпейді. Керісінше, бұл – алаяқтықтың басты белгісі.

Асан Ахметжан, ҚР Ұлттық банкі баспасөз қызметінің басшысы:

- Ұлттық банк жеке тұлғаларға қызмет көрсетпейді. Несие бермейді, депозит ашпайды. Шот ашпайды. Жеке тұлғаларға ешқандай қызмет көрсетпейтіндіктен, жеке тұлғаларға Ұлттық банк ешқашан хабарласпайды. Қоңырау шалмайды, хат жібермейді. Сондықтан ҰБ атынан жеке тұлғаға хабарласып жатса, бұл алаяқтық болуы мүмкін дегенді естен шығармаған жөн.

Сонымен қатар мамандар Ұлттық банк күмәнді қорларға ақша салумен, ақшалай есеп айырылысу және қаражаты сақтандырумен айналыспайтынын қатаң ескертеді. Ал егер абайсызда алаяқтардың тұзағына түсіп қалсаңыз, бірден құқық қорғау органдарына жүгінген жөн. Сондай-ақ 1477 қысқа нөмірі арқылы Ұлттық Банктің Байланыс орталығына хабарласуға болады.

Авторлары: Назерке Тоқжан, Жандос Битабаров

Соңғы жаңалықтар мен жаңартуларды жіберіп алмау үшін Qazaq24.com сайтынан бақылауды жалғастырыңыз, біз жағдайды қадағалап, ең өзекті ақпаратты ұсынамыз.