Ұлттық экономика министрі Вашингтонда инвесторлармен кездесті

“Қазақстанның тұрақты дамуы жолында Дүниежүзілік банкпен ынтымақтастық басты бағыттардың бірі болып қала береді”.

Бұл туралы премьер-министрдің орынбасары -  Ұлттық экономика министрі Серік Жұманғарин Дүниежүзілік банк пен Халықаралық валюта қоры жанындағы Швейцария тобының отырысында мәлімдеді. Қазақстан делегациясы Дүниежүзілік банктің вице-президенті Антонелла Бассанимен, рейтингтік агенттік өкілдерімен және АҚШ конгресмендерімен кездесті.

Вашингтонда  қызу қарбалас. Дүниежүзілік банк пен Халықаралық валюта қорының күзгі жиындарына  шартараптан  экономистер келіп, өз еліне тиімді жағдай жасауға тырысатын шақ. Қасым-Жомарт Тоқаевтың қыркүйектегі Нью-Йоркке сапарының ізін суытпай Ерболат Досаев пен Серік Жұманғарин бастаған делегация АҚШ астанасына келіп, американдық бизнесмендер мен инвесторлардың басын қайта қосып, президент сапарындағы келіссөздерді жүзеге асыру қамына кірісті. Байырғы серіктестер ынтымақтастықты берік ете түсуді көздесе, жаңалары қайткенде бірлесе жұмыс істей аламыз дегенге жауап іздеді. Астанадан келген үкімет өкілдерімен бетпе-бет кездесіп, толғандырған мәселелерді ортаға салды.

Михеил Нибладзе, Cerberus Frontier атқарушы директоры:

- Қазақстанның АҚШ-қа жоғары деңгейдегі делегация жіберуі – американдық компаниялармен ынтымақтастыққа дайын екенін көрсетеді. Бұл маңызды бастама, өйткені жеке секторда да, мемлекеттік деңгейде де байланыстарды нығайтуға зор мүмкіндік бар. Ендігі маңызды қадам – келісімдерді жүзеге асыру. Бұл кезең ең күрделі және аса зор ыждаһаттылықты қажет етеді. Тараптар бұған сақадай сай деп сенемін.

Әлібек Қуантыров, ҚР Сыртқы істер министрінің орынбасары:

“Экономикалық инвестициялық ынтымақтастықты кеңейту үшін әрі қарай, мысалы, Boeing компаниялары кіріп жатыр. Біздегі үлкен ірі мұнай-газ компаниялары, жасанды интеллект бойынша компаниялар, көлік секторында жұмыс істейтін компаниялар және бірнеше жоғары білім саласындағы, зерттеу саласындағы университеттер және басқа да ұйымдар Қазақстанға келе жатыр”.

Қазақстандық делегацияның күн тәртібіндегі өзекті мәселе - елімізге инвестиция тарту. Дүниежүзілік банк қабырғасында рейтингтік агенттіктің өкілдерімен  кездесіп, еліміздегі жаңа салық кодексі, қаржылық реформалар, инфляцияны төмендетуге бағытталған саясат пен макроэкономикалық көрсеткіштер туралы ақпарат берді.  

Серік Жұманғарин, ҚР Премьер-министрінің орынбасары, ұлттық экономика министрі:

- Біз бүгін Moody’s, Fitch және S&P агенттіктерімен кездестік. Бұл Қазақстан үшін өте маңызды. Себебі біз алатын қарыздың пайыздық мөлшерлемесі осы агенттіктер беретін бағаға тікелей байланысты. Яғни біздің рейтингіміз неғұрлым жоғары болса, қарызды соғұрлым арзан аламыз. Ал ол ертең елдің қарызды аз шығынмен қайтаруына мүмкіндік береді. Қуаныштысы, бұл агенттіктер Қазақстанға «инвестициялық деңгейдегі» рейтинг беріп отыр. Moody’s – BBB+(Мудиз – үш би плюс), Fitch – BBB- (Фитч –  үш би), ал S&P (Эс әнд пи)  жуырда болжамын «тұрақтыдан» «позитивтіге» өзгертті.

Қазақстандық делегация АҚШ конгресінің өкілдерімен де кездесті. Елімізбен ынтымақтастықты қос партия да қолдайтынын демократ Джимми Панетта, Томас Суоззи мен республикашыл Кэрол Миллер, Кевин Крамер, Бил Хейзинга, Брайан Мастпен болған жүздесулер айғақтап тұр. Тараптар энергетика, жасанды интеллект, білім беру және цифрлық технологиялар салаларындағы әріптестікті тереңдету мәселелерін сөз етті. 

Ердана Ержанұлы