Ұлттық парламентке ешкім нұсқау бере алмайды: Шаталов ЛГБТ насихатына тыйым салуға байланысты пікір білдірді

Бүгін Мәжілісте «ЛГБТ насихатына тыйым салу» жөніндегі түзетулер қаралды. Осыған байланысты кейбір халықаралық құқық қорғау ұйымдары Қазақстаннан аталған нормаларды алып тастауды талап еткен мәлімдемелер тарата бастаған. Алайда депутаттар мұны «ақылға қонымсыз әрекет» деп атады. Бұл туралы Мәжіліс депутаты Никита Шаталов мәлімдеді, деп хабарлайды Aikyn.kz сайты Тurkystan.kz сілтеме жасап

– Ешкім ұлттық парламентке қандай заң қабылдау керегін бұйыра алмайды. Ақпараттық қысым арқылы өз көзқарасын таңуға тырысу – халықаралық тәжірибеге де қайшы, – деді депутат өз сөзінде.

Оның айтуынша, бұл заң адамның жеке өміріне араласпайды.

– Қазақстанда ешкім жынысына немесе көзқарасына байланысты қудаланбайды. Бұл – Конституцияға және мемлекеттің негізгі қағидаттарына қайшы болар еді. Әңгіме жеке өмір туралы емес, қоғамдық кеңістіктегі тәрбиелік әсер мен ақпараттық орта туралы болып отыр, – деді ол.

Түзетулердің негізгі мақсаты – балалар мен жасөспірімдерді отбасы мен неке туралы түсінігін бұзатын, моральдық құндылықтарға нұқсан келтіретін контенттен қорғау.

– Бұл адамдардың болмысын жоққа шығару емес, тек қоғамға жат өмір салтын насихаттауды шектеу, – деп түсіндірді депутат.

Ол сонымен қатар халықаралық құқық нормаларына да сілтеме жасады.

– Бала құқықтары туралы БҰҰ конвенциясының 17-бабы мемлекеттерге балаларды зиянды ақпараттан қорғау міндетін жүктейді. Яғни, біз қабылдап отырған заң халықаралық стандарттарға толық сәйкес келеді. Сонымен бірге, Еуропалық конвенцияның 10-бабында да сөз бостандығы мораль мен денсаулықты қорғау мақсатында заңмен шектелуі мүмкін екені анық жазылған, – деді ол.

Депутат қоғамның бұл тақырыптағы ұстанымы айқын екенін де атап өтті.

– Мыңдаған азамат ресми петицияға қол қойып, билікке өз пікірін жеткізді. Бұл – елдің сұранысы. Оны елемеу – қоғам пікірін елемеу, – деді ол.

Сөзін түйіндей келе, депутат әріптестерін заң жобасын қолдауға шақырды.

– Бұл құжаттың мақсаты – біздің балаларымыздың, ұлтымыздың болашағын қорғау. Ол ешкімнің құқығын бұзбайды, керісінше, қоғамның рухани тұтастығын сақтауға бағытталған, – деді ол.