Ұлттық қор активтері 64,6 млрд долларға жетті Ұлттық банк

Ұлттық банк төрағасының орынбасары Әлия Молдабекова өткен жылдардағы қаражат алудың қор табыстылығына әсері туралы айтып берді. Оның айтуынша, 2025 жылдың қорытындысы бойынша Ұлттық қордың табыстылығы рекордтық деңгейге жетіп, 8,7 млрд доллар болды.

- Өткен жылы трансферттер көлемі айтарлықтай жоғары болғанына қарамастан, қор көлемі өсті. Егер 2024 жылдың соңында ол 58,8 млрд доллар болса, 2025 жылдың соңында 63,9 млрд долларға жетті. Қазіргі таңда Ұлттық қордың нарықтық құны 64,6 млрд доллар болып отыр, – деді ол.

Журналистердің Ұлттық қор қаражатын пайдалануға қосымша шектеулер енгізу жоспары бар ма деген сұрағына жауап берген Әлия Молдабекова трансферттер қазірдің өзінде контрциклдік бюджеттік ереже арқылы шектелгенін атап өтті.

- Кепілдендірілген трансферт мұнайдың өте консервативті бағасына негізделген бюджеттік ережемен қатаң шектелген. Ал нысаналы трансферт мемлекеттік шығыстар бойынша белгіленген шекті деңгеймен шектеледі, – деді ол.

Оның мәліметінше, 2025 жылы жалпы трансферттер көлемі (кепілдендірілген және нысаналы) 5,2 трлн теңгеден асқан. Ал 2026 жылы бұл көрсеткіш шамамен 2,2 трлн теңге деңгейінде белгіленген.

- Бұл – айтарлықтай қысқару. Себебі биыл нысаналы трансферттер жоспарланбаған, тек кепілдендірілген трансферттер қарастырылған. Бұл Ұлттық қордан қаражатты аз көлемде алуға мүмкіндік береді. Ал Ұлттық банк басқарушы ретінде қорды тиімді басқару және оны ұлғайту мәселелеріне көбірек көңіл бөле алады, – деп түсіндірді спикер.

Айта кетейік, Қазақстан Ұлттық қордан бөлінетін трансферттерден толық бас тартуды әзірге жоспарлап отырған жоқ.