“Ұлттық қор балаларға“ қазақстандықтар 62,7 миллион доллардан астам қаражатты неге жұмсады

"Ұлттық қор – балаларға" бағдарламасы бойынша тұрғын үй жағдайын жақсарту мен білім алуға 62,7 миллион АҚШ доллары бағытталды. Бұл туралы БЖЗҚ мәлімдеді, деп хабарлайды Tengri Education.

"Жинақтар баспанаға"

Компания мәліметінше, 2024 жылғы 1 ақпаннан 2026 жылғы 1 шілдеге дейінгі аралықта бағдарламаға қатысушылар жалпы сомасы шамамен 62,71 миллион АҚШ долларын құрайтын 333 809 өтінім бойынша нысаналы жинақтарын пайдаланған. Қаражат кейіннен өтініш берушілердің банктік шоттарына аударылуы үшін уәкілетті операторларға жолданды.

Өтінімдердің басым бөлігі тұрғын үй жағдайын жақсартуға қатысты болды - 41,01 миллион АҚШ долларынан астам сомаға 216 060 өтінім. Білім ақысын төлеу үшін бағдарлама қатысушылары 21,69 миллион АҚШ доллары сомасына 117 749 өтінім берген.

Анықтама: Еске сала кетейік, нысаналы жинақтарды (НЖ) алушы соманы толықтай немесе оның бір бөлігін пайдалануға құқылы. Талап етілмеген қаражат 10 жыл бойы нысаналы жинақтау шотында (НЖШ) сақталады. Осы мерзім өткен соң пайдаланылмаған қалдық ерікті зейнетақы жарналары ретінде есепке алыну үшін алушының жеке зейнетақы шотына аударылады.

Қазақстандықтар нысаналы жинақтарын көбіне одан әрі жинақтау мақсатында тұрғын үй құрылыс жинақтарындағы салымдарын толықтыру үшін пайдаланған. Бұл бағыт бойынша олар шамамен 40,25 миллион АҚШ доллары сомасына 211 474 өтінім берді.

Сонымен қатар, бағдарлама қатысушылары қаражатты тұрғын үй сатып алу үшін ипотека бойынша бастапқы жарнаға - 269,48 мың АҚШ доллары сомасына 1 583 өтінім бағыттады. Тағы 177,79 мың АҚШ доллары сомасына 1 081 өтінімді олар азаматтық-құқықтық мәмілелер бойынша баспана сатып алу кезіндегі түпкілікті есеп айырысу үшін қолданған.

Білім беру саласында қазақстандық оқу орындарында оқу ақысын төлеу - кезең-кезеңімен, әр академиялық кезең немесе оқу жылы үшін, сондай-ақ бүкіл оқу мерзіміне біржола төлеу ең көп сұранысқа ие болды. Бұл мақсаттарға қазақстандықтар шамамен 20,36 миллион АҚШ доллары сомасына 108 782 өтінім берген.

Сондай-ақ бағдарлама қатысушылары білім беру жинақтау салымдарын толықтырды - бұл бағыт бойынша шамамен 894,12 мың АҚШ доллары сомасына 6 153 өтінім түсті. Тағы 335,33 мың АҚШ доллары сомасына 2 175 өтінім шетелдік білім беру ұйымдарындағы оқу ақысын төлеуге бағытталды.

Баланың қатысуын қалай тексеруге болады?

Ата-аналар мен басқа да заңды өкілдер баланың бағдарламаға қатысуын kids.enpf.kz сайтында ЖСН бойынша, eGov.kz порталындағы жеке кабинетте, сондай-ақ eGov Mobile мобильді қосымшасында және кейбір екінші деңгейлі банктердің қосымшаларында тексере алады.

Егер 2025 жылдың қорытындысы бойынша есептелген нысаналы талаптар туралы мәліметтер көрінбесе, құжаттарды жаңарту қажет.

Бұл үшін eGov Mobile қосымшасында "Цифрлық құжаттар" бөлімін ашып, содан кейін "Отбасы" бөліміне өтіп, "Құжаттар тізімін жаңарту" және "Ұлттық қордан аударымдар" бөлімін таңдау керек.

Екінші деңгейлі банктердің қосымшаларында, мысалы Kaspi.kz-те, "Мемлекеттік қызметтер" бөлімін, кейін "Барлық құжаттарды" ашып, "Құжаттар тізімін жаңарту" және "Ұлттық қордан аударымдар" бөлімін таңдау қажет.

БЖЗҚ 2026 жылы 18 жасқа толған немесе толатын балалардың нысаналы жинақтары туралы мәліметтерді ата-аналары көре алмайтынын түсіндірді. Кәмелетке толғаннан кейін нысаналы талаптар нысаналы жинақ мәртебесіне ие болады, сондықтан ақпаратқа қолжетімділікті бағдарлама қатысушысының өзі алады.

Ол үшін оған БЖЗҚ сайтындағы немесе электрондық үкімет порталындағы жеке кабинетіне өз бетінше кіріп, жинақтары туралы мәліметтерді тексеруі керек, ал 18 жасқа толғаннан кейін уәкілетті оператор арқылы АҚШ долларымен банктік шот ашып, қаражатты тұрғын үй жағдайын жақсартуға немесе білім алуға пайдалану үшін онлайн өтінім беруі қажет.

"Жыл сайын Ұлттық қордан аударымдар алады"

Еске сала кетейік, 2025 жылдың қорытындысы бойынша бағдарламаға қатысушы әр балаға 130,71 АҚШ долларынан есептелді. 2024 жылдың қорытындысы бойынша - 129,38 АҚШ доллары, ал 2023 жылдың қорытындысы бойынша - 100,52 АҚШ доллары болды.

18 жасқа толғанға дейін балалар жыл сайын Ұлттық қордан нысаналы талаптар түрінде аударымдар алады. Сонымен қатар қаражат Ұлттық қор активтерінің құрамында қалып, инвестициялануын жалғастырады, соның арқасында жинақ сомасы инвестициялық табыс есебінен жыл сайын артып отырады.

Нәтижесінде, инвестициялық табысты ескере отырып, жинақталған нысаналы талаптардың жалпы сомасы келесідей:

370,56 АҚШ доллары - бағдарламаға үш жыл қатысқан балалар үшін; 263,93 АҚШ доллары - бағдарламаға екі жыл қатысқандар үшін; 130,71 АҚШ доллары - бағдарламаға бір жыл қатысқан балалар үшін.

Google News арқылы жаңалықтарымызды қадағалаңыз

Жазылу