Ұлыбритания бір жылда 250 мыңға дейін жұмыс орнын жоғалтуы мүмкін

The Guardian газетінің жазуынша, жетекші аудиторлық фирмалар Ernst & Young және Deloitte жүргізген екі зерттеу Таяу Шығыстағы геосаяси шиеленістерге байланысты іскерлік сенімінің төмендеуі аясында Ұлыбританияның экономикалық әлеуетінің айтарлықтай нашарлағанын көрсетіп отыр.

Екі болжамдағы негізгі теріс фактор – Иранға айналасындағы қақтығыстың ушығуы, соның ішінде теңіз сауда жолдарындағы жеткізілімнің үзілуі және энергия ресурстарына бағалардың өсуі.

Британдық Ernst & Young экономикалық болжам тобының бағалауынша, Ұлыбритания экономикасы биылғы жылдың екінші және үшінші тоқсандарында тоқырауға ұшырайды. Өсім 2025 жылғы 1,4%-дан биыл 0,7%-ға дейін екі есеге дейін төмендейді деп болжанып отыр.

Одан бөлек, жұмыссыздық деңгейі 2027 жылдың ортасына қарай 5,8%-ға дейін (қазіргі деңгей – 5,2%) артуы мүмкін, бұл ретте шамамен 250 мың адам жұмысынан айырылуы мүмкін.

Инфляцияның жеделдеуі де болжанып отыр: 2026 жылдың екінші жартысында ол 4%-ға жақындауы мүмкін. Бұл Англия Банкінің 2%-дық мақсатынан екі есеге жуық жоғары.

Deloitte жеке зерттеуі Ұлыбританияның ірі компанияларында қаржы директорларының көңіл-күйінің айтарлықтай нашарлағанын көрсетті. Сенім индексі -57%-ға дейін төмендеді (алдыңғы тоқсанда -13%), бұл Covid-19 пандемиясы басталған уақыттан бері ең төменгі деңгей.

Сауалнамаға қатысқандардың атап өтуінше, бизнес үшін негізгі сыртқы қауіп – геосаяси тұрақсыздық. Алаңдаушылықтың негізгі факторлары қатарында энергия ресурстары бағасының өсуі (61%), инфляциялық қысым мен пайыздық мөлшерлемелер деңгейі (61%) және кибершабуылдың көбеюі (60%) бар.

Тәуекелдердің артуына жауап ретінде компаниялар инвестициялық бағдарламаларды қысқарту, шығындарды бақылауды күшейту және өтімділікті арттыруды қоса алғанда, консервативті қаржылық саясатқа өтіп жатыр. Бұл шаралар Ұлыбританияда экономикалық белсенділік пен жұмыспен қамту динамикасына қосымша тежеушілік әсер етеді деп күтіліп отыр.

Осыған дейін Тегеран АҚШ-пен келіссөздердің екінші раундына қатыспайтынын мәлімдегенін хабарладық.