Ұлыбританияда 2008 жылдан кейін туған азаматтарға темекі сатып алуға тыйым салынады

Темекі мен вейп туралы заң жобасы дүйсенбі күні парламенттегі соңғы кезеңнен өтті. Лордтар палатасы 2024 жылдан бері әзірленіп келе жатқан құжатқа енгізілген аздаған түзетулерді мақұлдады.

Жаңа бастамаға сәйкес, 2027 жылғы 1 қаңтарға дейін 18 жасқа толмайтын азаматтар енді ешқашан темекі мен басқа да темекі өнімдерін заңды түрде сатып ала алмайды. Енді темекі сатып алуға рұқсат етілетін ең төменгі жас жыл сайын бір жасқа ұлғайып отырады. Бұл іс жүзінде 2009 жылғы 1 қаңтардан кейін туғандардың барлығына өмір бойы тыйым енгізілетінін білдіреді.

Сонымен қатар вейп қолдануға қатысты шектеу де кеңейтіледі. Енді кәмелетке толмаған жолаушылар отырған көліктерде, балалар алаңдарында, мектептердің маңында және ауруханаларда вейп пайдалануға тыйым салынады. Қазіргі темекі шегуге тыйым салынған орындардың басым бөлігі вейптен де азат аймаққа айналады.

Алайда бұл шектеу мейрамханалар мен пабтардың ашық алаңдарына, сондай-ақ жағажайлар мен жеке аумақтар сияқты кең ашық кеңістіктерге қолданылмайды. Тұрғын үйлерде темекі өнімдері мен вейп қолдануға рұқсат сақталады.

Заңға корольдік мақұлдау берілгеннен кейін британ министрлері темекі, никотин өнімдері мен вейптерді реттеу бойынша қосымша өкілеттіктерге ие болады.

Бұл бастама елдегі алдын алуға болатын өлім-жітімнің, мүгедектіктің және денсаулықтың нашарлауының басты себептерінің бірі саналатын темекі шегудің зиянын азайтуға бағытталған кешенді саясаттың бір бөлігі.

Корольдік мақұлдау — заң шығару процесінің соңғы кезеңі. Ол Ұлыбритания королі қол қоятын рәсім ретінде жүзеге асады және елде көбіне формалды сипатқа ие.

Қазіргі уақытта болашақ ұрпақтың темекі өнімдеріне қолжетімділігін шектеуге бағытталған бастамалар санаулы елдерде ғана жүзеге асырылып жатыр. Мысалы, Мальдив аралдарында 2007 жылғы 1 қаңтардан кейін туғандардың бәріне, соның ішінде туристерге де, темекі шегуге және темекі сатуға тыйым салынған.

Мұндай тәсілді алғаш енгізген ел Жаңа Зеландия болған. Алайда 2023 жылы үкімет ауысқаннан кейін бұл заң толық күшіне енбей жатып-ақ жойылды.

Бұған дейін Ақмарал Әлназарова қоғамдық орындарда кальян шегуге қойылған тыйымды жұмсарту мүмкіндігіне қатысты пікір білдірген еді. 

Айта кетелік Түркия темекі шегуге тыйымды күшейткен еді.