Прагада 2026 жылдан бастап электросамокатқа тыйым салынады

Aikyn.KZ парақшасынан алынған деректерге сүйене отырып, Qazaq24.com мәлімдеме жасады..

2026 жылдың қаңтар айынан бастап Чехия астанасы Прагада электросамокатты жалға алуға ресми түрде тыйым салынады. Қала басшысының орынбасары туристер үшін ыңғайлы саналатын бұл көлік түрін сынға алып, оның жаяу жүргіншілерге кедергі келтіретінін айтты, - деп хабарлайды Aikyn.kz Reuters ақпараттық агенттігіне сілтеме жасап.

Дүйсенбі күні Прага қалалық кеңесі 1,4 миллион халқы бар қаладағы көлік қозғалысын реттеуге арналған жаңа ережелерді мақұлдады. Тарихы терең көшелерімен әйгілі бұл шаһар 2024 жылы 8 миллионнан астам турист қабылдаған.

Жаңа ережеге сәйкес, велосипедтің барлық түріне арналған тұрақтар қатаң реттеліп, қалада электросамокатты жалға алу қызметіне толық тыйым салынбақ.

Прага билігі тұрғындардан келіп түскен шағымдар негізінде осындай қадамға барғанын мәлімдеді.

«электросамокаттың дәуірі ресми түрде аяқталды! Біз қоғамдық орындарды самокаттан арылтатын нақты ережелерді енгізіп отырмыз. Себебі соңғы жылдары бұл көлік түрі туристерге арналған аттракционға айналып, бейберекет қозғалыс салдарынан жаяу жүргіншілер үшін қолайсыздық туындатты», - деп нақтылады Праганың көлік мәселелеріне жауапты вице-мэрі Зденек Гржиб.

Осы ретте қала әкімдігі велосипедке басымдық беруді көздеп отырғанын жеткізді. Өйткені самокаттар жол-көлік оқиғаларына жиі себеп болатыны анықталған.

Соңғы жылдары Чехиядан бөлек, басқа да еуропалық мемлекеттер электросамокатқа бақылауды күшейтуде. Мысалы, Италияда дулыға кию мен сақтандыру шаралары міндеттелсе, Париж бен Мадридте электросамокатты жалға алуға толық тыйым салынған. Ал Финляндияда 15 жасқа толмаған балаларға электрсамокатты пайдалануға рұқсат жоқ.

Маңызды жаңалықтар мен жаңартуларды өткізіп алмау үшін Qazaq24.com сайтын қадағалаңыз.