Ұлыбританияда небәрі 2 күнге жететін газ қоры қалды

Aikyn.kz британдық Telegraph басылымының материалына сүйеніп, газ қорының төтенше азаюын түсіндіреді.

Газ құбырлары операторы National Gas жариялаған жаңа мәліметке сай, Ұлыбританиядағы газ қоры былтырғы 1,6 млрд м³ деңгейден 610 млн м³ дейін қысқарған. Бұл сұранысты 1,5 күнге ғана жабуға жеткілікті. Сұйытылған табиғи газ (СТГ) түрінде резервуарларда шамамен осындай көлем сақталған. Ал Еуропа керісінше, бірнеше аптаға жететін газ қорын жинап қойған.

Жеткізілім тапшылығы салдарынан трейдерлер Ұлыбританияға газды жоғары бағамен ұсынып отыр. Тапшылықты болдырмау үшін тұманды арал қазір Еуропада ең жоғары көтерме газ бағасын төлейтін болды.

Осыған қоса жұма кешінде (6 наурыз) Goldman Sachs талдамалық жазба жариялап, Таяу Шығыстағы мұнай дағдарысының ауқымы Украинадағы шиеленіс басталған 2022 жылдағы мұнай -газ өндірісіне тиген «ең жоғарғы соққыдан» 17 есе үлкен болуы мүмкін екенін ескертті.

Банк: «Қазір мәселе шешілу белгілері көрінбесе, мұнай бағасы келесі аптада 100 доллардан жоғары көтерілуі ықтимал. Егер Ормуз бұғазы арқылы мұнай ағыны наурыз бойы төмен болып қалса, мұнай бағасы мен мұнай өнімдері 2008 және 2022 жылдардағы шектен де асып кетуі мүмкін», – дейді. 

Пенсильвания университетінің профессоры Мохамед Эль-Эриан да Ұлыбританиядағы үй шаруашылықтары Таяу Шығыстағы шиеленіс салдарынан баға өсуінен «барлық жағынан» зардап шегетінін айтқан. BBC Radio 4-тегі Today бағдарламасында ол: «Ұлыбритания сыртқы күйзелістерге қарсы әлдеқайда осал. Бұл ипотекалық мөлшерлемелердің өсуіне әкеледі. Өкінішке қарай, қарапайым адам бірнеше бағытта зардап шегеді», – дейді. 

Қазір Ұлыбритания АҚШ-тан келетін СТГ танкерлерінің үздіксіз ағынына және Норвегиядан құбыр арқылы келетін газға сүйеніп, электр қуатын және үйді жылыту жүйесін қамтамасыз етуде. Арал іс жүзінде «айлықтан айлыққа» өмір сүріп отырғандай.

Бұрын Ұлыбританияда 12 күнге жететін газ қоры сақталатын. Алайда кейінгі министрлер бұл жүйені қаржыландыруды қысқартып, күйретті. Соңғы онжылдықта қысқа мерзімді қоймалардың бірқатары консервацияланды.

National Gas өкілі арал газдың негізгі бөлігін Норвегиядан және Солтүстік теңізден алатынын айтып: «Ұлыбритания жеткізілім көздерінің кең ауқымына ие. Бұл сұраныс пен ұсынысты теңестіруге қажетті икемділікті береді», – дейді.

Алайда National Gas министрлерге жолдаған баяндамасында Солтүстік теңіздегі өндіріс күрт төмендей бастаған кезде газ қоймаларының жеткіліксіздігіне алаңдаушылық білдірілген.

Баяндамада National Gas бас директоры Джон Баттерворт энергетика министрі Эд Милибэндке елдің үздіксіз электрмен қамтылуы үшін үш жаңа газ қоймасы немесе СТГ-ны өңдеп, газды ұлттық құбыр жүйесіне айдайтын алты ірі баржа қажет болатынын ескерткен.