Жаңаөзендегі газ өңдеу зауыты небәрі 40% дайын

Энергетика министрі Жаңаөзендегі газ өңдеу зауытының құрылысын жеделдетуді тапсырды.

Ерлан Ақкенженов Маңғыстау облысына сапары барысында жобаның айтарлықтай кешігіп жатқанын атап өтті. Келісімшарт бойынша құрылыс мерзімі 36 ай болса, оның 29 айы өтіп кеткенімен, дайындық деңгейі небәрі 40 пайызға жеткен.

Министр мердігерлердің қарқыны қанағаттандырмайтынын айтып, жұмысты бірнеше есе жылдамдатуды талап етті. Құрылыс-монтаж жұмыстарының орындалуы 13 пайыз ғана, бетон жұмыстары да жоспардан әлдеқайда артта қалған.

Технологиялық жабдықтарды жеткізу ісінде де кешігулер бар: тапсырыс берілген 259 позицияның тек 98-і ғана жеткізілген. Осыған байланысты жабдықтарды жеткізуді жеделдету және модульдік құрастыру қуаттарын арттыру тапсырылды.

Ақкенженов Жаңаөзен газ өңдеу зауытының стратегиялық маңызын атап өтіп, жобаны белгіленген мерзімде аяқтау қажеттігін айтты. Құрылыс алаңына қосымша жұмыс күші мен техника тартылып, ең қызған кезеңде 1200-ге дейін маман еңбек ететін болады.

Зауыт іске қосылған соң жылына 900 млн текше метр газ өңдеп, 743 млн текше метр тауарлық газ, 217 мың тонна сұйытылған мұнай газы және 122 мың тонна пентан-гексан фракциясын өндіру жоспарланған.

Энергетика министрлігі енді мердігерлерден апта сайын құрылыс барысы мен кешігулерді жою жөнінде есеп алатын болады. Жобаны пайдалануға беру 2027 жылға белгіленген.

Кеше, 15:01