Қытайдан Жаңаөзенге газ өңдеу зауыты жабдығының бірінші партиясы жөнелтілді

Жаңаөзенде салынып жатқан жаңа газ өңдеу зауыты үшін жасалған жабдықтың бірінші партиясы Қытайдан Қазақстанға жөнелтілді.

Маңғыстаудағы жаңа газ өңдеу зауытының құрылыс алаңын «ҚазМұнайГаз» ҰК АҚ Басқарма төрағасы Асхат Хасенов тексеріп шықты.  

Болашақ кәсіпорын үшін ұзақ уақыт жасалатын негізгі жабдықтар Қытай Халық Республикасындағы (ҚХР) өндірістік алаңдарда әзірленіп жатыр. Бүгінгі таңда 240 позицияның 122-сі дайын болды, тағы 118-і жасалуда.

Жаңаөзендегі зауыттың құрылысында модульдік әдіс қолданылады, бұл оны елдегі осыған ұқсас басқа кәсіпорындардан ерекшелендіреді. Басты технологиялық модульдер зауытта дайындалуда, кейін олар іргетасы құрылып, монтажы жүргізілетін құрылыс алаңына жеткізіледі. Бұл дайындық деңгейін арттырады және жұмыс көлемін азайтады.

Жалпы салмағы 30 мың тоннаға жуық 38 модуль әзірленеді деп жоспарлануда. Олардың ұзындығы 45 метрге, ені 9 метрге және биіктігі 11,5 метрге жетеді.

Биылғы тамыз айында ҚХР-дағы теңіз портынан дайындалған жабдықтың алғашқы партиясы Қазақстанға жөнелтілді. Бұдан кейінгі жабдықтар мен технологиялық модульдер бекітілген кестеге сай жіберілетін болады.

Қазіргі кезде зауыттың өртке қарсы су қоры резервуарларына, сондай-ақ сұйытылған көмірсутек газын, жеңіл көмірсутек кең фракциясын және пентан-гексан фракциясын сақтау резервуарларына арналған іргетастарды орнату жұмыстары аяқталды. Құрылыс алаңына оларды орнату үшін материалдар 100%, яғни толығымен жеткізілді.

Сонымен қатар сыртқы электрмен жабдықтау нысанының құрылысы аяқталды, іске қосу-баптау жұмыстарына дайындық жүріп жатыр.

Зауыттың негізгі өндірістік және жалпы шаруашылық нысандарының іргетастарын орнату жалғасуда, әкімшілік-шаруашылық аймағының монолитті темірбетон конструкциялары салынып жатыр. Бетон жұмыстарының жалпы көлемі шамамен 65,8 мың м³ құрайды. Тамыз айының соңындағы жағдай бойынша 9,5 мың м³ бетон төселді. Құрылыс қарқынын жеделдету жөніндегі шаралар ескеріле отырып, бетон жұмыстарының негізгі көлемі жыл соңына дейін орындалады деп жоспарлануда.

Ірі жоба Мемлекет басшысының тапсырмасы бойынша іске асырылуда және жылына 900 млн м³ дейін табиғи және ілеспе газды өңдей алатын заманауи өндірістік кешен құруды көздейді. Зауыт Маңғыстау облысының халқы мен өнеркәсіптік нысандарын тауарлық және сұйытылған мұнай газымен, сондай-ақ пентан-гексан фракциясымен қамтамасыз етеді.

Жаңа газ өңдеу зауытын салумен қатар Маңғыстау өңірі үшін әлеуметтік маңызы бар жұмыс істеп тұрған газ өңдеу зауытының тұрақты қызметі – басты міндеттердің бірі. ҚМГ басшысы жұмыс сапары барысында екі қосымша компрессорлық қондырғыны монтаждау жүргізіліп жатқан ҚазГӨЗ-де болды. Бұл шаралар шикі газды өңдеуге үздіксіз қабылдауды қамтамасыз етеді және тауарлық газ өндіру көлемін арттырады. Айта кетсек, жаңа кәсіпорын іске қосылғаннан кейін жұмыс істеп тұрған зауыттың қазіргі жүктемесінің шамамен 30-40% деңгейінде пайдалануын сақтап қалу жоспарланған. ҚМГ зауытты алдағы жылдарға қажетті шикізат көлемімен қамтамасыз ету мәселелерін пысықтауда.

Бүгін, 10:10