Ұлытау облысында Отбасылық ферма құрылады

Ұлытау облысының Жаңаарқа ауданында «Отбасылық ферма» жобасы жүзеге асырылуда. Мақсат - өңірде ауыл шаруашылығын дамыту, мал басын ұлғайту және бәсекелестік орта құру. 30-дан астам шаруашылықты бір ұжымға біріктірген бастаманың әзірге еш өңірде баламасы жоқ дейді мамандар.

«Отбасылық ферма» жобасын жүзеге асыруға 6,9 миллиард теңге бағытталып отыр. Оның 1,2 миллиарды жергілікті бюджеттен, қалғаны Солтүстік Қазақстан облысының тәжірибесін енгізу мақсатында республика қазынасынан бөлінді. Жобаға қатысуға алты ауылдық округтен 34 шаруа қожалығы тілек білдірген. Мал бағамын деген шаруаларға Түгіскен ауылынынан 80 мың гектар жер берілді. Қазір оларға тұрғын үй, мал ұстауға арналған қора салынып жатыр. Сондай-ақ 13 мыңға жуық қой, 8 мың бас сиыр және 60 тан астам ауыл шаруашылығы техникасы сатып алынады.  

Саят Сәлкебаев, Түгіскен ауылының әкімі:

- Қазір Түгіскен ауылына 12 900 бас ұсақ-түйек қос басы келіп жатыр. оның 500-і асыл тұқымды Еділбай қошқары. 12 400 бас саулық. Олардың өзінің қора-жайлары бар, жем-шөбі бар және тұратын тұрғылықты үй-жайлары осы қаражат есебінен салынып жатыр. 

Жобаға құйылған қаржы шаруашылықтарға жылдық үстемесі 2,5 пайызбен 10 жыл мерзімге беріледі. Несиені шаруалар аяққа тұрып кеткеннен кейін, яғни екі жылдан соң ғана қайтара бастайды. Мемлекет қолдауымен іс бастаған шаруаның бірі - Елжан Қартаев. Ол 600 бас Еділбай қойы мен 150 ақбас тұқымды сиыр алған. 

Елжан Қартаев, шаруа:

- 2,5 пайызбен бізге ақша бөлініп жатыр. Енді сол малымызды, техникамызды беріп жатыр, сол артықшылығы бұл жерде. Малымыз, қора-жайымыз, үйіміз бәрін салып береді өздері. Шаруашылықпен айналысам деген кісілерге қолдау бар. Шаруалар сиыр мен қойдың етін нарыққа шығару үшін алысқа бармайды. Ол үшін Түгіскен, Айнабұлақ, Орынбай ауылдарында бордақылау алаңы, сою цехы салынып жатыр. Яғни мал өнімі бір ғана ауданның ішінде өңделеді. «Жобаның артықшылығы да осында», - дейді жауапты мамандар. 

Нұрғиса Мырзабек, Ауыл шаруашылығы басқармасының бөлім басшысы:

- Басқа облыстарда жоқ жоба деп айтсақ болады. Толық циклды өндірісті бізде қамтиды. Бұл жерде толық циклды өндіріске не кіреді? Мұнда мал өсіру, сонымен қатар малды сол жерде сою, малдың етін өңдеп вакумдеу, сонымен қатар биенің сүтін өңдеу кіреді.

«Отбасылық ферманы» құрудағы негізгі мақсат - шағын шаруашылықтарды қолдау арқылы өңірде азық-түлік қауіпсіздігін нығайту. Жоба толық күшіне енгенде 100-ден астам жаңа жұмыс орны пайда болады. Болашақта осы жобаның тәжірибесімен Жезқазған қаласына қарасты Талап ауылында асыл тұқымды ешкі шаруашылығын құру жоспарланып отыр. 

Авторлары: Елдос Кәкенов, Нұрбол Үздікбаев, Гүлшаһира Серекбаева