Ұлытау облысында Республика күні ұлықталды

Ұлытау облысында Республика күніне арналған салтанатты іс-шара өтті.

Мерекелік жиынға еңбек ардагерлері, мәдениет пен өнер саласының өкілдері, түрлі мамандық иелері қатысты. Мемлекетке сіңірген еңбегі үшін бірқатар азамат мемлекеттік ордендер мен медальдарға ие болды. Сондай-ақ мәдениет пен қоғам қайраткерлеріне Құрмет грамоталары табысталды. Мерекелік шараға қатысушылар Қазақстанның мемлекеттік рәміздерін ұлықтап, тәуелсіздіктің қадірі мен ел бірлігінің маңыздылығын атап өтті.

Мерекелік шараға өңірдің еңбек ардагерлері, түрлі сала кәсіпорындарының қызметкерлері және жастар ұйымдарының өкілдері қатысты. Қоғам қайраткерлері де жиынның көркін келтірді. Өз сөзінде облыс әкімі Дастан Рыспеков еліміздің өркендеуінде әр азаматтың еңбегі маңызды екеніне тоқталды.

Дастан Рыспеков, Ұлытау облысының әкімі:

- Республика күні - бұл халқымыздың бірлігі мен ынтымағының арқасында көптеген сын-қатерді еңсеріп, жалпыұлттық тұтастығымызды сақтап, егемендігімізді нығайта түсуге үндейтін мереке. Құрметті ағайын! Ұлытау облысы экономикалық әлеуеті жоғары өңір. Мұнда түсті металлургия, тау-кен өндірісі және ауыл шаруашылығы салалары қарқынды дамып келеді. Ең басты байлығымыз – ол бірлік пен татулық. Осы құндылықтар арқылы біз кез келген қиындықты еңсеріп, жаңа жетістіктерге жете береміз.

Көп жылдар бойы қоғам игілігі үшін еңбек еткен облыс тұрғындары елімізге сіңірген ерекше еңбегі үшін «Парасат», «Құрмет», «Еңбек даңқы» секілді ордендер мен басқа да мемлекеттік наградаларға ие болды. Солардың бірі - мемлекет және қоғам қайраткері Көпеев Мұхамбет Жұманазарұлы.

Мұхамбет Көпеев, Қазақстанның Еңбек сіңірген қайраткері:

- Бұл Республика күні Тәуелсіздіктің ең алғашқы негізі болып қаланды. Егемендік деген – бұл үлкен бізге берген бақ. Осы бақтың биыл 35 жыл болғанын тойлап отырмыз. Мен әруақта елімнің көркейгенін, халқымның бақуатты өмір сүргенін қалаймын, талантты жастарымыздың Қазақстанды алдыңғы қатарлы алпауыт мемлекеттердің қатарына қосатынына кәміл сенемін және қасы тілек тілеймін.

Ұлытау облысында өнеркәсіп, ауыл шаруашылығы, шағын және орта бизнес қарқынды дамуда. Түрлі мамандық иелері, мәдениет және өнер қайраткерлері, көпбалалы аналар құрмет грамоталарымен және медальдармен марапатталды. Нұрғиса Тілендиев атындағы «Отырар сазы» мемлекеттік академиялық фольклорлық-этнографиялық оркестрінің өнер көрсетуі ұлттық мерекенің ажарын ашып, көпшілікке тосынсыйдай әсер қалдырды.

Авторы: Серік-Ибраһим Орынбек