Ұлытау өңірінде 2028 жылға дейін бірқатар инвестжоба іске асады

Ұлытау өңірінде 2028 жылға дейін 25 инвестициялық жоба іске асады.

Осылайша өңірдің бизнес әлеуетін күшейтіп, жаңа өндіріс орындарын ашуға мүмкіндік туады. Бұл туралы аймақ басшысы Дастан Рыспеков Орталық коммуникациялар алаңында өткен баспасөз мәслихатында айтты. Құрылғанына 3 жыл болған өңірдің дамуы жайлы тілші айтып береді.

Бүгінде 20 мыңнан астам ұлытаулық отын тасып, күл шығару машақатынан арылды. Ал 2030 жылға дейін табиғи газдың игілін көрушілер қатары 63 мыңға артпақ. Енді тәй-тәй басқан өңірде кадр тапшылығы өзекті мәселе. Биыл аймаққа табан тіреген 25 медицина қызметкері 170 млн теңге көлемінде көтерме ақы алды. 15 дәрігер баспанамен қамтылған.

Дастан Рыспеков, Ұлытау облысының әкімі:

- Биылғы жылы 138 млрд теңгені құрайтын 17 инвестициялық жоба бастау алды. Оның ішінде қазірг таңда мұнай базасын, жел электр стансасын және респераторлар шығару зауытының құрылысы аяқталды. 2028 жылға дейін жалпы құны 920 млрд теңгені құрайтын 25 инвест жоба пулы қалыптастырылып, 2 мыңнан астам жаңа жұмыс орнын ашу көзделіп отыр. 

Ұлытау өңірінде ауыл шаруашылығының аяқ алысы ширақ. Үш жылда салаға 8,5 млрд теңге инвестиция тартылған. Бұл тұралап тұрған аграрлық сектордың тамырына қан жүгіртіп, жаңа өндіріс орындарының пайда болуына жол ашты. Сондай-ақ қарапайым халықтың бизнеске бет бұруына қолдау мығым. Биыл 195 кәсіпкер қайтарымсыз грантқа қол жеткізген.

Дастан Рыспеков, Ұлытау облысының әкімі:

- 2025 жылы 4,9 млрд теңгеге 819 км электр желілелері мен 272 электр жабдықтарын жаңғырту және жөндеу жұмыстары жүргізілді. Оның ішінле 1,8 млрд теңгеге жұмыстар монополист кәсіпорындардың бекітілген инвестициялық жобалары арқылы іске асырылды. 

Еліміздегі жалғыз аутизмі бар балаларды қолдау орталығы Ұлытау өңірінде ашылды. Сондай-ақ биыл демеушілердің көмегімен Жезқазғанда 250 орындық оқушылар сарайының құрылысы басталды.

Назерке Тоқжан, Ақылбек Есімсейітов