ҰҚК 45 миллиард теңгенің мұнай өнімдерін шығару схемасын әшкереледі

Қазақстанның Ұлттық қауіпсіздік комитеті (ҰҚК) мұнай өнімдерін пеш отыны кейпінде шетелге заңсыз шығарып келген ұйымдасқан топтың әрекетін тоқтатты. 2019-2023 жылдар аралығында шекара асырылған 160 мың тоннадан астам өнімнің құны шамамен 45 миллиард теңгені құрайды, деп хабарлайды Tengrinews.kz.

Схема қалай жұмыс істеді?

Тергеу мәліметінше, бұл схеманы Маңғыстау облысының кәсіпкері ұйымдастырған. Ол шикі мұнай сатып алу үшін жер қойнауын пайдаланушы компаниялармен келісімшарттар жасасқан.

Содан кейін шикізат Standart Petroleum және Mangystau Oil Refining шағын мұнай өңдеу зауыттарында қайта өңделген. Өнімдерге жалған сапа паспорттары ресімделген.

Бұдан кейін мұнай өнімдері пеш отыны түрінде Ақтау теңіз порты арқылы танкерлермен шетелге жөнелтіліп отырған.

ҰҚК мәліметінше, 2019-2023 жылдар аралығында тек Batys Nefte Trade ЖШС арқылы 160 мың тоннадан аса мұнай өнімі заңсыз экспортталған. Операциялардың жалпы сомасы шамамен 45 миллиард теңгеге жеткен.

Биыл қылмыстық іс аясында айыпталушылардың активтері, шағын мұнай өңдеу зауыттары, танкер және басқа да мүліктері тәркіленді.

Бұдан бөлек, заңсыз алынған табыстар мен төленбеген салықтар есебінен мемлекет пайдасына екі миллиард теңгеден аса қаражат өндірілді.

Бұған дейін Ақтау қалалық соты ұйымдасқан қылмыстық топтың бес мүшесіне қатысты үкім шығарған болатын. Сотталғандардың арасында шағын МӨЗ мен трейдерлік компанияның басшылары бар.

Олар Қазақстан Республикасы Қылмыстық кодексінің 234-бабы 3-бөлігі және 262-бабы 2-бөлігі бойынша кінәлі деп танылды. Сот олардың әрқайсысына сегіз жылға бас бостандығынан айыру жазасын кесті.

Қылмыстық схеманы ұйымдастырушыға халықаралық іздеу жарияланды.

Еске сала кетейік, бұған дейін жыл басынан бері Қаржылық мониторинг агенттігі Ішкі істер министрлігімен және ҰҚК Шекара қызметімен бірлесіп, елімізден тыс жерлерге ЖЖМ заңсыз шығарудың 712 әрекетінің жолын кескені хабарланған болатын. Мұнай өнімдерінің заңсыз айналымы мен контрабандасы фактілері бойынша 8 сотқа дейінгі тергеу амалдары басталды.

Бізді Google-дың негізгі дереккөздер тізіміне қосыңыз