ҰҚК Әбілязовпен байланысы болуы мүмкін бельгиялық бизнесменге іздеу жариялады

Қазақстанның Cыбайлас жемқорлыққа қарсы іс-қимыл қызметі бельгиялық кәсіпкер әрі инвестор Фрэнк Джозеф Монстрейге іздеу жариялады. Бұл туралы ақпарат Бас прокуратураның Құқықтық статистика және арнайы есепке алу жөніндегі порталында жарияланды, деп хабарлайды Tengrinews.kz тілшісі.

Қазақстанның Cыбайлас жемқорлыққа қарсы іс-қимыл қызметі бельгиялық кәсіпкер әрі инвестор Фрэнк Джозеф Монстрейге іздеу жариялады. Бұл туралы ақпарат Бас прокуратураның Құқықтық статистика және арнайы есепке алу жөніндегі порталында жарияланды, деп хабарлайды Tengrinews.kz тілшісі.

Фрэнк Джозеф Монстрейге іздеу жарияланғаны туралы ақпарат порталда осыдан екі күн бұрын шыққан. Іздеу ісі Астанада тіркелгені хабарланды.

Ұлттық қауіпсіздік комитеті бастамашы болып, іздеу шараларын ҰҚК жанындағы Сыбайлас жемқорлыққа қарсы іс-қимыл қызметі жүргізіп жатыр. Монстрейдің нақты қандай іс бойынша іздестіріліп жатқаны және оның мәртебесі қандай екені туралы басқа мәліметтер әзірге белгісіз.

Осыған байланысты Tengrinews.kz редакциясы ҰҚК-ге ресми сауал жолдады.

qamqor.gov.kz сайтынан алынған скриншот

Ер адам 1965 жылы туғаны және шетел азаматы екені нақтыланған.

Ашық дереккөздерде Фрэнк Джозеф Монстрей бельгиялық кәсіпкер және инвестор, бұрынғы мұнай магнаты ретінде сипатталады. Ол 2000-жылдардан бастап бұрынғы кеңестік елдерде, соның ішінде Қазақстанда белсенді жұмыс істеген.

Оның Қазақстандағы негізгі бизнес-жобасы Nostrum Oil & Gas (бұрынғы "Жайықмұнай") мұнай-газ компаниясы болды. Кейін ол компанияны Лондон биржасына шығарып, мұнай-газ секторынан кеткен болатын.

Бірқатар жарияланымда Фрэнк Монстрейдің есімі қашқын қылмыскер Мұхтар Әблязовпен ықтимал байланысы және Nostrum Oil & Gas компаниясының активтеріне қатысты даулар төңірегінде аталған.

Kiar.center мәліметінше, 2017 жылы Лондонның Жоғарғы соты БТА Банкінің Әблязов пен басқа да жауапкерлерге қарсы ісі аясында бастаған талқылаулар аясында Монстреймен байланысты компаниялардың акцияларымен жасалатын операцияларға шектеу қойған. Кейін, 2017 жылдың маусымында тараптар Nostrum акциялар пакеті бойынша келісімге келіп, содан кейін Монстрейге қатысты құрылым компания иелігінен ішінара шықты.

Сыбайлас жемқорлық пен ұйымдасқан қылмысты зерттеу орталығының (OCCRP) 2018 жылғы зерттеуінде журналистер құжаттар арқылы 440 миллион доллар көлеміндегі ірі ақша ағындарын бақылап, олардың нұсқасы бойынша, бұл қаражат Фрэнк Монстрей бақылайтын немесе оған қатысы бар компаниялармен байланысты болған делінген.

Зерттеу деректеріне сәйкес, бұл қаражат 2011–2012 жылдары офшорлық құрылымдар арқылы өткен және соңында БТА Банкі мен Мұхтар Әблязов ісіне қатысты күрделі қаржылық тізбектің бөлігіне айналған.

Британ соты оның Nostrum Oil & Gas-тағы үлесіне қатысты активтердің бір бөлігін бұғаттағаннан кейін, көп ұзамай Монстрей компания төрағасы қызметінен кетіп, кейін бизнестен шығу және акцияларын БТА Банкіне сату туралы келісімге отырды.

Бұл ретте Монстрейдің өзі журналистерге Әблязовтың жасырын өкілі болмағанын мәлімдеп, бұл Қазақстандағы бұрынғы іскерлік қарым-қатынастары аясында туындаған қарызды қайтару мәселесі екенін және өзінің тараптар арасындағы қақтығысқа еріксіз тартылғанын алға тартқан.