Ұшақ Астанаға бірінші реттен қона алмады себебі аталды

Әлеуметтік желілерде Алматы - Астана бағыты бойынша ұшқан ұшақтың бірінші әрекеттен қона алмағаны туралы ақпарат тарады. Жолаушылар әуе кемесінің екінші айналымға кетуіне техникалық ақау себеп болуы мүмкін деп болжады. Жағдайға қатысты қазақстандық әуекомпанияның баспасөз қызметі түсініктеме берді, деп хабарлайды Tengri Travel.

Мән-жайы

Оқиға туралы Алматы - Астана бағытындағы FS7055 рейсінің жолаушысы мәлімдеді. Оның айтуынша, ұшақ бірінші әрекеттен қона алмаған.

"FlyArystan компаниясының Алматы - Астана бағытындағы (FS7055 рейсі, ұшу уақыты 16:55) рейсінде төтенше жағдай болды. Ұшақ бірінші реттен қона алмады. Нақты не болғаны туралы кімде ақпарат бар? Жолаушылардың алдын ала болжамынша, қозғалтқышта ақау туындауы мүмкін", - деп жазды ол.

Жолаушының айтуынша, борттағыларға не болғаны түсіндірілмеген, ал қонғаннан кейін жай ғана ұшақтан шығуды сұраған.

Біз ақпарат алу үшін FlyArystan баспасөз қызметіне хабарластық.

Онда ұшақтың шынымен де екінші айналымға кеткенін растады, алайда бұған ауа райының өзгеруі себеп болған.

"1 тамызда Алматы - Астана бағыты бойынша FS7055 рейсі қону кезінде метеорологиялық жағдайлардың өзгеруіне байланысты экипаж екінші айналымға кету туралы шешім қабылдады. Қайта айналып келгеннен кейін әуе кемесі сәтті қонды", - деп бөлісті әуекомпаниясы өкілдері.

Әуе тасымалдаушысының мәліметінше, экипаж қауіпсіздік мақсатында екінші айналымға кету туралы шешім қабылдаған. Сонымен қатар компания бортта ешқандай техникалық ақау болмағанын атап өтті.

"Бұл ретте әуе кемесінің барлық жүйесі штаттық режимде жұмыс істеді, ұшуды орындауға әсер ететін ешқандай техникалық ақаулар анықталған жоқ", - деп атап өтті әуекомпания.

Тағы оқыңыз: Әуежайдағы жаңа тұрақ ережелері қарағандылықтарды таңғалдырды

Google News арқылы жаңалықтарымызды қадағалаңыз