Ұшақ ұшудан көп ұзамай тауға соғылды үш адам қаза тапты

Швейцариядағы Флухалп аймағында Cirrus SR22T жеңілматорлы ұшағы таудың солтүстік беткейіне соғылды. Бортта болған үш адамның бәрі қаза тапты. Апаттың себебі әзірге белгісіз, - деп хабарлайды Tengri Travel тілшісі Liverpool Echo мәліметіне сілтеме жасап.

Не болды?

Басылым мәліметінше, апат күндіз Вале кантонында болған. Cirrus SR22T ұшағы Луганодан ұшып шығып, Сион әуежайына қонып, содан кейін Нидвальден кантонындағы Бухс аэродромына қарай сапарын жалғастырған.

Сағат 16:00-ден көп ұзамай ұшақ Лейкербад маңындағы Флухалп аймағында солтүстік беткейге соғылған. Оқиғаның себебі әлі анықталған жоқ.

Куәгерлер тау маңындағы қою түтінді байқап, бұл туралы құтқарушыларға хабарлаған. Оқиға орнына үш тікұшақ пен екі құтқару маманы жіберілді. Алайда жеткен құтқарушылар борттағы үш адамның да қаза тапқанын растаудан басқа ештеңе істей алмады.

"Сағат 16:00-ден көп ұзамай ұшақ Лейкербад қаласының Флухалп аймағындағы таудың солтүстік беткейіне соғылды. Содан кейін бұл аумақта түтін белгілері пайда болды", - делінген жергілікті билік өкілдерінің мәлімдемесінде.

Жергілікті полиция жариялаған суреттерден тау беткейіне шашылып қалған ұшақ сынықтарын көруге болады.

[16.09-17:00] Лейкербад, Лейк, Вале кантоны, Швейцария
Луганодан ұшып шығып, Сион әуежайында аялдаған соң Нидвальден кантонындағы Бухсқа бағыт алған Cirrus SR22T ұшағы сағат 16:00-ден кейін Флухалп аймағының солтүстік беткейіне құлады. 3 адам қаза тапты… pic.twitter.com/3RFVMvsUkl

— Emergenza24 (@Emergenza24) 2026 жылғы 16 қыркүйек

Апат салдарынан борттағы үш адамның барлығы қаза тапты. Қазір полиция олардың кім екенін анықтап жатыр, бірақ қаза болғандардың екеуі Ұлыбритания азаматтары екені белгілі болды.

Ұлыбритания Сыртқы істер министрлігі қаза тапқан отандастарының отбасыларына көмек көрсетіп жатқанын хабарлады.

Қаза тапқандардың бірі - 55 жастағы ұлыбританиялық бизнесмен Оуэн Дэвис екені кейінірек БАҚ-тан белгілі болды. Ол Amcanu инженерлік компаниясының басшысы болған және әріптестерінің айтуынша, авиациямен айналысқанды ұнатқан.

Тергеу жұмыстарын бірден бірнеше швейцариялық ведомство жүргізіп жатыр.

Швейцарияның көліктегі оқиғаларды тергеу қызметі (SUST) апаттың себебін анықтау үшін тексеруді бастады. Сонымен қатар, Конфедерация прокуратурасы Вале кантонының полициясымен бірлесіп қылмыстық тергеу жүргізіп жатыр.

Әзірге билік техникалық ақауды да, ауа райын да, пилоттың қателігін де апаттың нақты себебі ретінде атаған жоқ. Барлық нұсқа тергеу аясында тексерілуі тиіс.

Тағы оқыңыз: Ұшақ әуежай аумағына құлап, өртенген: екі адам қаза тапты

Бізді Google-дың негізгі дереккөздер тізіміне қосыңыз