Ұшақтар дәл төбеңізде Алматыда ең инстаграмдық орын жаңартылды

Егер сіз әлеуметтік желілерден алып ұшақтың адамның дәл төбесінен бірнеше метр биіктікте ұшып бара жатқан кадрларын көрген болсаңыз, олардың дәл осы жерде түсірілуі әбден мүмкін. Алматыда әуежай маңындағы лайнерлердің қонуын тамашалауға арналған танымал бақылау алаңы жаңартылды. Tengri Travel ол жерге қалай баруға болатынын және қай уақытта барған дұрыс екенін айтып береді.

Алаңның қалай өзгергені туралы Threads-те желі қолданушысы баяндады. Ол жаңартылған орынның фотосуреттерін жариялап, енді бұл жерде уақыт өткізу әлдеқайда жайлы бола түскенін атап өтті.

"Алматы қаласы әуежайындағы бақылау алаңы абаттандырылды: орындықтар қойылып, гүлдер егілді және жақсы тұрақ жасалды. Рақатын көріңіздер, алматылықтар!" - деп жазды жазба авторы.

Бақылау алаңы қай жерде орналасқан?

Астаналық фотограф Галина бұл орынды кездейсоқ тауып алғанын айтты. Жол жөндеу жұмыстарына байланысты оған әуежайға айналма жолмен баруға тура келген. Ғимараттың сырт жағында жиналып тұрған көп адамды көріп, тоқтап, бірнеше сурет түсіріп алған. Кейінірек бойжеткен бұл алаңды қалай табуға болатынын егжей-тегжейлі түсіндіріп берді.

"Алматыдағы ұшақтарды суретке түсіруге арналған негізгі әрі ресми жабдықталған нүкте - халықаралық әуежай маңындағы арнайы бақылау алаңы, ол Ахметов көшесі Нұғманов көшесіне ұласатын жерде орналасқан", - деді ол.

Ұшақтарды бақылауға арналған алаңның нақты координаттарын мына сілтеме арқылы көруге болады. Фотографтың айтуынша, мұнда ұшақтар әр бес минут сайын ұшып өтеді, сондықтан күтіп отырып жалығу мүмкін емес.

Instagram-дағы бұл жазбаны көру

A post shared by ФОТОГРАФ | АГЗАМОВА ГАЛИНА | АСТАНА (@agzamovagalina_photo)

Қандай кадрлар түсіруге болады?

Бір қарағанда, төбеңізден ұшып бара жатқан ұшақпен түсетін танымал фотоларды қайталау өте оңай көрінуі мүмкін. Алайда, Галинаның айтуынша, ол жариялаған сурет үшін бәрібір де аздаған өңдеу қажет болған.

Фото: Instagram/@agzamovagalina_photo

Дегенмен, осындай кадрды ұстап қалу әбден мүмкін. Ол үшін жақсы объектив, төменнен алынған дұрыс ракурс және ұшақ қажетті нүктеде болуы үшін уақытты дәл есептеу керек.

Керемет кадр үшін ұзақ аңдығысы келмейтіндерге қарапайым нұсқа қолайлы. Әуе лайнері қонуға бет алған сәтті күтіп, смартфондағы сериялық түсірілімді қосып, камераны жоғары бағыттасаңыз жеткілікті - содан кейін серия ішінен ең жақсы кадрды таңдап аласыз.

Скриншот: 2gis.kz

Тағы оқыңыз: Ұшар алдында бой жазу: Қазақстан әуежайларында жаңа бастама қарастырылып жатыр

Google News арқылы жаңалықтарымызды қадағалаңыз

Жазылу