Ұшақтарда интернет қосылады министрлік

АСТАНА, 8 шілде – Sputnik. Жасанды интеллект және цифрлық даму министрлігі ұшақтарда интернет қызметін іске қосу мәселесін қарастырды, деп хабарлайды министрлік.

Министрліктің Телекоммуникациялар комитеті Air Astana және Viasat компанияларымен әуе кемелерінің бортында спутниктік интернет енгізу мәселесін талқылады.

Жолаушыларды ұшу кезінде жоғары жылдамдықты интернетпен қамтамасыз ету жобасын жүзеге асыру мүмкіндіктері зерделенді. Сондай-ақ әуе кемелерін спутниктік байланыс жүйелеріне қосуға байланысты құқықтық, техникалық және ұйымдастырушылық мәселелер қаралды.

Кездесу қорытындысы бойынша тараптар ынтымақтастықты одан әрі дамытуға мүдделі екенін білдіріп, бірлескен жұмысты жалғастыруға келісті.

Air Astana әуе кемелерінде бұл технологияны пилоттық режимде биыл төртінші тоқсанда сынақтан өткізу жоспарланып отыр.