Үшінші әрекеттен кейін: Атырауда 6,4 млрд теңгені жымқыру бойынша​ “ҚазТрансОйл” топ менеджерінің ісі сотқа жетті

Атырауда «Астрахань – Маңғышлақ» магистральды су құбырының реконструкциясына бөлінген ірі қаржыны жымқыру ісі бойынша сот процесі басталды. Айыпталушы орнында – бұрын «Магистральды су құбыры» ЖШС-нің бас директоры болған, қазіргі таңда «ҚазТрансОйл» ұлттық компаниясының топ-менеджері Берік Сәлпек отыр.

Бұл іс стратегиялық маңызы барсумен қамту жобасымен байланысты: Қиғаш өзенінен алынған ауыз су Атырау мен Маңғыстау облыстарының елді мекендеріне және ірі мұнай-газ кәсіпорындарына жеткізіледі. 

Соңғы жылдары магистральды жүйенің өткізу қабілеті төмендегендіктен, «ҚазТрансОйл» АҚ-на құбырдың бір бөлігін қайта жаңарту тапсырылды. Бұл жұмыстарды сол кезде Берік Сәлпек басқарып отырған «Магистральды су құбыры» ЖШС атқарған. Ал негізгі мердігер ретінде «АСК Құрылыс-Компаниясы» ЖШС тартылған. Жобаның жалпы құны 17 миллиард теңгеден асып кеткен.

Тергеу нұсқасына сәйкес, жоба барысында материалдардың бағасы қымбат көрсетілген. Құжаттарда құбырдың бір бағасы жазылғанымен, іс жүзінде олар әлдеқайда арзанға сатып алынған. Сонымен қатар, жоспарланған жұмыстардың бір бөлігі мүлде орындалмағаны анықталған.

Нәтижесінде мемлекетке 6 477 741 628 теңге көлемінде шығын келген. Тергеушілердің пайымынша, бұл қаражат жалған келісімдер арқылы шығарылған болуы мүмкін.

Іс материалдарында мердігер «АСК Құрылыс-Компаниясы» Берік Сәлпектің ұшақ билеттерін төлегені көрсетілген. Бұдан бөлек, фирма жобаға қатысы жоқ адамға 11 миллион теңге аударған.

Жұмыстар аяқталғаннан кейін Сәлпек қызметінде жоғарылап, «ҚазТрансОйл» АҚ-ның коммерция жөніндегі басқарушы директоры болып тағайындалған. Материал дайындалған сәтте оның қызметінен босатылғаны туралы ресми ақпарат жарияланбаған.

...2024 жылдың соңында Берік Сәлпек алаяқтық ісі бойынша күдікті деп танылды. Бұл іс бойынша оған қоса тағы төрт адам жауапқа тартылып отыр, олардың барлығы да жобаны жүзеге асыруға қатысы бар тұлғалар.

«Ақ Жайық» басылымы бұл оқиға жайлы 2024–2025 жылдары жазған болатын. Жаңартылған учаске іске қосылғаннан кейін Жылыой және Исатай аудандарының тұрғындары судың лайлығы мен жағымсыз иісіне шағымданған. Санитарлық қызметтің тексерістері судың түсі мен лайлығы бойынша нормадан асып кеткенін анықтады.

Сот процесінің басталғаны туралы журналист Михаил Козачков хабарлап, өзінің телеграм-арнасында істің егжей-тегжейін жариялаған.

Қылмыстық істің қай сотта қаралуы жөніндегі дау

2025 жылдың көктемінде іс алғаш Астанадағы қылмыстық істер жөніндегі ауданаралық сотқа түсті. Алдын ала тыңдау кезінде адвокаттар істі Атырау облысына жіберу туралы өтініш жасады, себебі олардың пікірінше, қылмыс сол жерде орын алған. Сот бұл өтінішті қанағаттандырды.

Алайда іс Атырауға жеткеннен кейін басқа қорғаушылар керісінше, материалдарды қайтадан Астанаға қайтаруды сұрады. Сонымен қатар олар істі прокурорға қайтарып, процессуалдық бұзушылықтарды түзетуді талап етті. Сот материалдарды прокуратураға жолдап, жаңа айыптау актісі дайындалды.

Осылайша, бірнеше мәрте қайтарылып, қайта қаралғаннан кейін іс ақыры Атырау қаласының №2 сотына түсті. Үшінші әрекеттен кейін ғана сот процесі басталды.

Сот процесі Атырау қаласының №2 сотында судья Нұртас Бөлекбаевтың төрағалығымен өтіп жатыр. Алғашқы отырыста қорғаушылар істі прокурорға қайтаруды тағы да сұрағанымен, сот бұл өтінішті қабылдамады.

Айыпталушылар бостандықта қалып отыр

Іс баяу жүріп жатыр: куәгерлерді табу қиын, кейбірі сотқа келмей қалады. 

Соған қарамастан барлық айыпталушылар әзірге бостандықта. Оларға тек елден шықпау және тәртіпті сақтау міндеттелген. Бұл шара жымқыру көлемі 6 миллиард теңгеден асатынына қарамастан таңдалған.

Анастасия ШЕРСТЯНКИНА

Бүгін, 15:18