Үздік түлектермен кездесу өтті

Жүздесуде Мемлекет басшысы Қасым-Жомарт Тоқаевтың жасанды интеллектіні дамыту, цифрлық технологияларды кеңінен енгізу және Қазақстанды заманауи цифрлық мемлекетке айналдыру бағытында берген тапсырмасы аясында ҚазҰУ-да атқарылған жұмыстардың нәтижесін таныстырып, алдағы жоспарымен бөлісті, – деп хабарлайды Aikyn.kz. Сондай-ақ жолдаудағы жастарға арналған тапсырмалардың  орындалуы жөнінде ақпарат берді. 

Іс-шараға бірінші курс студенттері, «Алтын белгі» иегерлері, халықаралық олимпиадалар мен жарыстардың  жеңімпаздары, қоғамдық шараларға белсенді араласып жүрген жастар қатысты. Бүгінде қара шаңырақ Қазақ ұлттық университетінде 30 мыңға жуық студент білім алады. 2026-2027 жаңа оқу жылында оқу орны құрамына барлығы 8117 білім алушы қосылды. Олардың қатарында 674 «Алтын белгі» иегері мен республикалық және халықаралық жарыстардың жеңімпаздары бар. 

Университет басшысы білім алушы жастарды жаңа оқу жылының басталуымен құттықтады. Жансейіт Түймебаев өз сөзінде қазіргі кезеңде жоғары білім беру жүйесінің алдында жаңа міндеттер тұрғанын атап өтті. 

«Біз үшін ең басты құндылық – студент. Сондықтан цифрлық өзгерістер ең алдымен жастардың сапалы білім алуына, ғылыми ізденісіне және кәсіби дамуына қызмет етуі керек. ҚазҰУ студенттері еліміздің цифрлық экономикасын қалыптастыратын жаңа буын мамандары болуы тиіс», – деді ректор.

Кездесуде жастардың азаматтық жауапкершілігі мен қоғамдық мәдениеті де назардан тыс қалмады. Ректор қазіргі кезеңде заң мен тәртіпті сақтау, қоғамдық ортадағы әдеп нормаларын ұстану, үлкенге құрмет, кішіге ізет көрсету әрбір студенттің күнделікті өмір салтына айналуы тиіс екенін жеткізді. 

Сонымен қатар университет басшысы студенттерді салауатты өмір салтын ұстануға, дұрыс тамақтануға, спортпен тұрақты айналысуға және зиянды әдеттерден аулақ болуға шақырды. Университет аумағының тазалығы мен жасыл желекті сақтау да әрбір жастың ортақ жауапкершілігі екені айтылды.

Бұған қосымша, кітап оқу мәдениетін қалыптастыру мен жастардың интеллектуалдық деңгейін арттыру мәселесіне де ерекше мән берілді. Жансейіт Қансейітұлы Мемлекет басшысы ұсынған ұлттық әдебиеттің таңдаулы шығармаларын оқудың маңызына тоқталып, студенттер арасында кітап оқуға деген қызығушылықты арттыру қажеттігін айтты.

Жүздесу соңында Жансейіт Түймебаев студенттердің жаңа идеялары мен бастамалары университеттің нығаюына маңызды рөл атқаратынын атап өтіп, жастарды ғылымға, инновацияға және елдің цифрлық дамуына белсенді үлес қосуға үндеді.

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз.