Астанада әйел педагогтардың көшбасшылығын арттыруға арналған кездесу өтті

Астанадағы Техникалық колледжде «Білім берудегі әйелдер көшбасшылығы: табысқа бастар жол» атты іс-шара өтті, – деп хабарлайды Aikyn.kz сайты.

Іс-шара барысында білім беру жүйесіндегі әйелдер көшбасшылығын дамыту мәселелері талқыланды.

Кездесуде білім саласындағы әйел көшбасшылардың рөлін күшейтуге бағытталған өзекті мәселелер мен табысты тәжірибелер қарастырылды.

«AMANAT» партиясының астаналық филиалы жанындағы әйелдер қанатының төрайымы Салтанат Дженалаева атап өтті:

«Іс-шараның негізгі мақсаты – білім беру саласындағы әйелдер көшбасшылығын дамытуға қолдау көрсету, табысты тәжірибелермен алмасу және педагогтарды жаңа жетістіктерге шабыттандыру. Біз әйелдердің тек кәсіби маман ғана емес, сонымен қатар білім беру жүйесін жақсартуға үлес қосатын нағыз көшбасшы бола алатынын көрсеткіміз келеді. Дүние өзгеріп келеді, әйелдердің рөлі де барған сайын артып отыр. Білім беру саласында әйел мамандардың үлесі басым болғанымен, басшылық қызметтерде олардың саны аздау. Сол себепті әрбір әйелдің әлеуетін ашуға және табыс жолында нық қадам жасауына мүмкіндік туғызу маңызды», – деді ол.

Іс-шараға жас педагогтар мен колледж түлектері шақырылды. Қатысушылардың айтуынша, бұл кездесу пікір алмасуға, жаңа идеяларды талқылауға және кәсіби байланыстар орнатуға арналған тиімді алаңға айналды.