Астанада аутизм мәселесіне арналған спектакль өтті

«Құштар». Елордадағы «Ozge Epic» креатив хабында тұсауы кесілген кезекті қойылым осылай аталады.

Бұл жолы артистер  аутизм тақырыбын тұңғыш рет сахна тілінде сөйлетті. Пьесса авторы - Әлішер Рахат. Ал қоюшы режиссері - Шырын Мұстафина. Тың туынды қоғамда инклюзия мәдениетін қалыптастыру,  ерекше қажеттілігі бар  адамдарды әлеуметтік ортаға белсенді тартуға үндейді. «Ozge Epic» ұжымы мен Сенат жанындағы сарапшылар клубының ортақ жобасы аутизм мәселесіне көркемдік рең беріп қана қоймай, ғылыми тұрғыдан үңіледі. Спектаклді дайындауға 4 бірдей театр әртістері, 20-дан астам сала маманы атсалысқан.

Мақпал Жұмабай, «Ozgeepic» Креатив хабының негізін қалаушы:

- Заң шығарушылардан бөлек, әлеуметтік мәселелермен айналысып жүрген түрлі түрлі ұйымдардан бөлек, жалпы халық не істеуі керек? Біздің халықтың, қоғамның мінез құлқы қалай өзгеруі керек. «Осы кезде өнер өзін қалай ұстауы керек?» деген күн тәртібіндегі сұрақтар туындағанда осы қоғамда өмір сүрген соң, бізді толғандырады.  Сондықтан «Өзге Эпик» кеңістігі аутизм мәселесін жан-жақты саралаймыз деп шешім қабылдадық.

Шырын Мұстафина, қоюшы режиссер:

- Драматург жазған пьессаны жай ойнап шығу емес, түсінбесең, ерекше зерттемесең өте қиын саханада көрсету. Мақпал ханым айтқандай, 8 ай дайындалып, 20 сарапшы осының бәрін зерттеп, мен көру керек болдым. Сол себепті мен қанша реабилитациялық орталыққа бардым. Балаларды зерттеп, сол балаларды көру өте ауыр болды.