Volkswagen штатын қысқартып, зауыттарын жабуға 16 млрд еуро бөледі

коллаж: ЖИ
Германияның Volkswagen автоконцерні қызметкерлерді қысқартуға және өндіріс орындарын қайта құрылымдауға шамамен 16 млрд еуро бағыттамақ. Бұл туралы Reuters компанияның есебімен таныс дереккөзге сілтеме жасап хабарлады.
Аталған қаражаттың шамамен 10 млрд еуросы әлем бойынша 60 мыңға дейін жұмыс орнын қысқартуға байланысты шығындарға жұмсалуы мүмкін. Тағы 6 млрд еуро Германиядағы төрт кәсіпорында автомобиль өндірісін кезең-кезеңімен тоқтатуға қажет болады.
Алдын ала есеп бойынша Эмден мен Цвиккаудағы зауыттарды қайта бейімдеуге әрқайсысына шамамен 1 млрд еуродан жұмсалады. Ганновер мен Неккарзульмдегі кәсіпорындарға қатысты шығын әр зауыт үшін 2 млрд еуроға жетуі ықтимал. Volkswagen бұл есепке әзірге ресми түсініктеме берген жоқ.
Әзірге зауыттарды бірден жабу туралы шешім қабылданбаған. Бекітілген жоспарға сәйкес, 2031–2034 жылдар аралығында аталған төрт кәсіпорында жаңа автомобиль модельдерін шығару тоқтатылуы мүмкін. Компания бұл өндіріс орындарын балама бағыттарда пайдалану мүмкіндігін қарастырады.
Жаңа бағдарлама бұрын келісілген қысқартуларға қосымша тағы 50 мыңға жуық жұмыс орнын жоюды көздейді. Нәтижесінде Volkswagen тобында қысқартылатын қызметкерлердің жалпы саны 100 мыңға жуықтауы мүмкін. Бұл шамамен 650 мың адам жұмыс істейтін концерн қызметкерлерінің 15%-ына тең.
Сонымен қатар Volkswagen модельдер қатарын екі есе қысқартып, өнім құрылымын айтарлықтай жеңілдетуді жоспарлап отыр. Концерн сұранысы мен табыстылығы жоғары автомобильдерге басымдық беріп, әр модельдің өндіріс көлемін арттыру және тұрақты шығындарды азайтуды көздейді.
Компания басшылығы ауқымды өзгерістердің қажеттілігін Еуропадағы артық өндірістік қуатпен, Қытай автоконцерндері тарапынан күшейген бәсекемен және АҚШ-тың импорттық тарифтерінің әсерімен түсіндіреді. Volkswagen бағалауынша, оның Еуропадағы зауыттары нарықтағы сұраныстан жылына шамамен 500 мың автомобиль артық шығара алады.
Дағдарыс ұзақ уақыт бойы Volkswagen табысының негізгі көздерінің бірі болған Қытай нарығында анық байқалады. Неміс концерні бұл елдегі позициясын жоғалтып қана қоймай, енді Еуропа нарығында да қытайлық брендтердің күшейген бәсекесіне тап болып отыр.
2026 жылдың бірінші жартысында Volkswagen-нің таза пайдасы шамамен 30%-ға төмендеді. Концерн басшысы Оливер Блюме қайта құрылымдау компанияның рентабельділігін арттырып, жаңа модельдер мен технологияларға инвестиция салуға мүмкіндік береді деп есептейді.
Volkswagen-нің қадағалау кеңесі қайта құрылымдау бағдарламасын өткен аптада мақұлдады. Дегенмен оны жүзеге асыру бірнеше жылға созылып, кәсіподақтармен, қызметкерлер өкілдерімен және Германияның өңірлік билігімен қосымша келіссөздер жүргізуді талап етеді.