WSJ: Иранда жерүсті операциясы жақын арада басталуы мүмкін

Ақ үй жақын күндері Иранда жерүсті операциясын өткізуге дайын отыр. Бұл туралы Wall Street Journal газетінің тілшісі Алекс Уорд республикашыл конгресмендерге сілтеме жасап мәлімдеді, деп хабарлайды Arasha.kz.

«[Америкалық шенеуніктер] Иранда жерүсті операциясы жоспарланып жатқанын және ол жақын арада басталуы мүмкін екенін ашық аңғартып отыр», — деп жазды Уорд өзінің X парақшасында.

Америкалық Axios порталының дереккөздеріне сүйеніп хабарлауынша, АҚШ Қарулы Күштері Вашингтон мен Тегеран арасында тікелей келіссөздер өткен күннің өзінде Иран аумағына кем дегенде тағы екі-үш апта бойы соққы беруді жоспарлап отыр. Бұған дейін NYT басылымы өз дереккөздеріне сілтеме жасай отырып, АҚШ Иран билігіне Таяу Шығыстағы қақтығысты тоқтату бойынша 15 тармақтан тұратын жоспар жібергенін хабарлаған болатын. Associated Press агенттігіне пәкістандық шенеуніктердің хабарлауынша, бұл жоспарды Иран тарапы алып үлгерген. Алайда, Тегеран тараптар арасында нәтижелі келіссөздер жүріп жатыр деген мәлімдемелерді жоққа шығаруда.