Ядролық ғылым және технологиялар орталығы құрылады

Алматыдағы Ядролық физика институтында зерттеу ядролық қондырғыларын жобалау, салу мен пайдалану мәселелеріне арналған семинар басталды. Іс-шараны Атом энергиясы жөніндегі агенттіктің қолдауымен Ядролық физика институты мен «Росатом Құрылыс Технологиялары» компаниясы бірлесіп ұйымдастырды.  

Фото: primeminister.kz

Семинар Қазақстан мен Ресейдің жетекші мамандарын біріктіріп, тәжірибе алмасу мен елдің зерттеу ядролық инфрақұрылымын одан әрі дамыту мәселелерін талқылау алаңы болды. Жиынды Атом энергиясы жөніндегі агенттік төрағасы Алмасадам Сәтқалиев ашып, ғылыми-зерттеу базасын жаңғыртудың стратегиялық маңыздылығын атап өтті. Ол сонымен қатар өнеркәсіп, атом энергетикасы мен ғылыми сектордың дамуы заманауи тәжірибелік қондырғылардың құрылуын қажет ететінін айтты.

«Мемлекет басшысы атом саласының ғылыми негізін нығайтуға нақты тапсырма берді, қолданыстағы қондырғыларды жаңғыртып, жаңа қондырғылар құруды қамтамасыз ету қажет. Ядролық физика институтында зерттеу реакторын салу, сондай-ақ Ұлттық ядролық орталықта ұқсас жобаны жүзеге асыру, заманауи технологияларды дамытуға, кадрлар даярлауға әрі ғылыми-өндірістік мүмкіндіктерді кеңейтуге бағытталған маңызды қадам. Еліміз әртүрлі технологиялық шешімдерге ашық және әлемдік тәжірибені ескере отырып, оңтайлы конфигурацияларды қарауға дайын», деді А.Сәтқалиев.

Семинар аясында Ядролық физика институты мен «Росатом Құрылыс Технологиялары» компаниясы арасында өзара түсіністік меморандумына қол қойылды. Құжат көпмақсатты зерттеу реакторы мен зертханалық кешенді бірлесіп жобалауды, сондай-ақ атом энергиясын бейбіт мақсатта қолдану саласында ынтымақтастықты кеңейтуді көздейді.

«Росатом Құрылыс Технологиялары» ЖШС-ның бас директоры Илья Вергизаев Қазақстандық серіктестерге ынтымақтастықты нығайтудағы жүйелі жұмысы үшін алғысын білдіріп, жаңа реактор елдің ғылыми-зерттеу мүмкіндіктерін кеңейтетінін алға тартты.

Бұған қоса, іс-шара барысында Қазақстан Республикасы мен «Росатом Құрылыс Технологиялары» компаниясы арасында Ядролық ғылым және технологиялар орталығын (ЯҒТО) құру мәселелері бойынша ынтымақтастық келісіміне қол қойылды. Құжат жобаны техникалық-экономикалық негіздеуді дайындау мен алғашқы іс-шараларды жүзеге асыру аясында өзара әрекеттесуді мақсат етеді.

Іс-шара барысында мамандар жаңа реактордың техникалық тұжырымдамалары мен мүмкін конфигурацияларын таныстырды, зерттеу бағыттарын, перспективалы материалдарды, заманауи изотоптық технологияларды және жаңа ғылыми нысанды іске қосқанда шешілетін міндеттерді талқылады.

Бірінші күннің қорытындысы ретінде қатысушылар болашақ зерттеу реакторын жобалау мен қолдану нұсқалары бойынша пікір алмастырған дискуссиялық сессия өтті.