Яна Легкодимованы өлтірген қылмыскерлер әлі этапталмады

Яна Легкодимованың қатыгездікпен өлтірілуіне кінәлі деп танылып, өмір бойына бас бостандығынан айырылған Ризуан Қайыржанов пен Алтынбек Қатимов әлі күнге дейін Атыраудағы тергеу изоляторында отыр.

Оларға қатысты үкім заңды күшіне енген. Жазасын олар ерекше режимдегі «Қара бүркіт» мекемесінде өтеуі тиіс. Бұл жерде жаппай кісі өлтіру қылмысы үшін сотталғандар, соның ішінде Владислав Челах пен Руслан Кулекбаев та бар.

Алайда сот шешімі орындалғанына қарамастан, этаптау әлі жүргізілмеген. 

Ресми себептер жарияланған жоқ. Дереккөздің айтуынша, кідіріс орын тапшылығына байланысты болуы мүмкін, сондықтан сотталғандар кезегін күтіп отыр.

Этаптау Ұлттық ұланның арнайы қарауылымен жүргізілуі тиіс екені де атап өтілді.

Редакция бұл жағдайға байланысты кешігу себептері мен этаптау мерзімдері туралы түсініктеме беруді сұрап, ҚАЖД-ға ресми сауал жолдады.

Айгүл МАНСУРОВА

Бүгін, 11:49