Зейнетақы қаражатын заңсыз алудың тағы бір схемасы әшкереленді

АСТАНА, 16 қазан — Sputnik. Қаржы мониторингі агенттігі басшысының орынбасары Жеңіс Елемесов журналистерге Қазақстанда БЖЗҚ-дан зейнетақы қаражатын мерзімінен бұрын алудың заңсыз схемасы әшкереленгенін айтты.

Бұл жолы зейнетақы қаржысы баспана сатып алу жолымен заңсыз шығарылғаны анықталған.

"Бұл стоматологиялық схемаға ұқсас", - деді Елемесов.

Бұған дейін жалған стоматологиялық клиникалар арқылы БЖЗҚ-дан миллиардтаған қаржы заңсыз шығарылғаны әшкереленген болатын. Мысалы, бір клиент тіс емдету үшін 11 рет өтініш беріп, 32,6 миллион теңгені (60 400 доллар) шығарып алған. "Отбасы Банк" әрбір импланттың құны 500 000 теңге (927 доллар) болған күннің өзінде бұл ақшаға шамамен 65 имплант орнатуға болатынын есептеп шықты.

2021 жылдан 2025 жылдың тамызына дейін банк платформасы арқылы 20 емханаға 222 миллиард теңге (411,5 миллион доллар) немесе тіс емдеу транзакцияларының жалпы көлемінің 30%-ға жуығы жіберілген. Бұл емханалардың жартысы Атырауда, қалғаны Астана мен Алматыда орналасқан.

Осы жағдайдан кейін қыркүйек айында стоматологиялық қызметке зейнетақы қаржысын пайдалану уақытша тоқтатылды.