Зейнетке шығу жасы ұлғаяды: Қазақстандағы жаңа ережелер мен төлем мөлшерлері

Қазақстанда әйелдердің зейнет жасын көтеруге енгізілген мораторий әлі де күшінде. Алайда 2028 жылдан бастап зейнет жасы кезең-кезеңімен ұлғайып, ерлердің зейнет жасымен теңеседі. Кімдер зейнетке мерзімінен бұрын шыға алады және төлемдердің мөлшері қандай? Бұл туралы Lada.kz хабарлайды.

2026 жылғы зейнет жасы

Қолданыстағы заңнамаға сәйкес, 2026 жылы зейнетке шығу жасы:

Ерлер үшін: 63 жас;

Әйелдер үшін: 61 жас.

Әйелдердің зейнет жасы 2027 жылдың соңына дейін 61 жас деңгейінде қалады. Зейнет жасын бес жылға «тоқтата тұру» туралы шешім 2022 жылы Президент Қасым-Жомарт Тоқаевтың тапсырмасы бойынша қабылданған.

2028 жылдан бастап зейнет жасы қалай өзгереді?

2028 жылғы 1 қаңтардан бастап әйелдердің зейнет жасы жыл сайын 6 айға ұлғаяды.

Осыған сәйкес, мынадай кесте белгіленген:

2026–2027 жылдар: 61 жас;

2028 жыл: 61 жас 6 ай;

2029 жыл: 62 жас;

2030 жыл: 62 жас 6 ай;

2031 жыл: 63 жас.

Осылайша, 2031 жылға қарай Қазақстанда әйелдер мен ерлердің зейнет жасы теңесіп, 63 жасты құрайды.

Кімдер зейнетке мерзімінен бұрын шығуға құқылы?

Заңнамада азаматтардың жеңілдік берілген санаттары қарастырылған:

Көпбалалы аналар: бес және одан да көп бала туған (немесе асырап алған) және оларды 8 жасқа дейін тәрбиелеген әйелдер 53 жаста зейнетке шыға алады.

Семей ядролық сынақ полигонындағы сынақтардан зардап шеккен азаматтар: заңда көзделген талаптарды орындаған жағдайда жеңілдікпен зейнетақы алуға құқылы.

Зейнетақы аннуитеті: БЖЗҚ-да жеткілікті зейнетақы жинағы болса, сақтандыру компаниясымен шарт жасасып, төлемдерді мерзімінен бұрын алуға болады. Жалпы ереже бойынша, аннуитет ерлерге 55 жастан, ал әйелдерге 53 жастан бастап қолжетімді.

2026 жылғы зейнетақы төлемдерінің мөлшері

Қазақстанда зейнетақы үш бөліктен тұрады: базалық, ынтымақты және жинақтаушы.

2026 жылы базалық зейнетақының ең төменгі мөлшері 35 596 теңгені, ал ынтымақты зейнетақының ең төменгі мөлшері (қажетті еңбек өтілі болған жағдайда) 69 049 теңгені құрайды.

Төлемдердің түпкілікті мөлшері әр адамға жеке есептеледі және ресми еңбек өтіліне, табыс деңгейіне және БЖЗҚ-дағы зейнетақы жинақтарының көлеміне байланысты болады. Зейнетақы тағайындауға өтінішті ХҚКО арқылы беруге болады.

Кеше, 17:15