Зеленский 90 млрд еуро кредиттің кешіккеніне алаңдаушылық білдірді

АСТАНА, 3 сәуір – Sputnik. Украина басшысы Владимир Зеленский Еуроодақ 90 миллиард еуро көлеміндегі кредитті кешіктіріп жатқанына алаңдаушылық білдірді.

"Украинаға арналған 90 миллиард еуролық қолдау пакеті әлі күнге дейін бұғаттаулы. Еуропалықтар әлі шешім таппай, уәдесін орындай алмай отыр", – деп жазды ол Telegram каналында.

Зеленский сондай-ақ Еуропа жақын арада шешім тауып, қаражат бөлетініне үміт білдірді.

Еуродипломатия басшысы Кая Каллас 31 наурызда Украинаға ірі кредит бөлу мәселесі бойынша жақсы жаңалығы жоқ екенін айтты.

Венгрия 18 ақпанда Украинаға дизель жеткізуді тоқтатты, ал 20 ақпанда Ресейден мұнай тасымалы қайта басталғанға дейін Еуроодақтың 90 миллиард еуро кредитін бұғаттады.

Венгрияның сыртқы істер және сыртқы экономикалық байланыстар министрі Петер Сийяртоның айтуынша, бұл қадам Киев билігінің "бопсасына" жауап ретінде жасалған. Оның сөзінше, Украина "Дружба" мұнай құбыры арқылы мұнай транзитін саяси себептермен қайта бастамай, елде энергетикалық дағдарыс туғызуға және сәуірдегі сайлауға әсер етуге тырысып отыр.

Венгрия премьер-министрі Виктор Орбан ЕО-ның Киевке бөлген 90 миллиард еуро кредиті туралы айта келе, Будапешт бұл төлемді Ресей мұнайының "Дружба" құбыры арқылы транзиті қайта жанданғанда ғана қолдайтынын мәлімдеді.